Ireen Wüst

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Irene Karlijn Wüst (Goirle, 1 aprèl 1986) is 'n Nederlandse sjaatserijster. Ze is 'n typisch all-roundrijster, mèt gooj rizzeltaote zoewel op de 1.000 es op de 1.500 en 3.000 meter. Häör belaankriekste rizzeltaote zien de gouwe medaljes op de Olympische Winterspeule in Turijn (2006), Vancouver (2010) en Sotsji (2014).

Carrièr

In 't sezoen 2003/04 woort Wüst twiede op de Wereldkampioensjap juniore. 't Sezoen dao-op woort ze zelfs wereldkampioen juniore en braok ze, same mèt leeftiedgenoot Sven Kramer, door bij de seniore (veerde op 't EK, vijfde op 't WK; bij allebei de bèste Nederlandse). Dit lieverde häör e contrak op bij sjaatsploog TVM.

Via 't Nederlands Kampioensjap aofsten kwalificeerde ze ziech veur de 1.000, 1.500 en 3.000 meter op de Olympische speule vaan 2006 in Turijn. Ouch deeg ze mèt in de plogeachtervolging. Op de 3.000 meter haolde ze 'n gouwe medalje, op de 1.500 meter 'n broonze (achter de Canadese Cindy Classen en Kristina Groves). Bij de 1.000 meter veel ze zjus neve 't podium. Um häör gouwe medalje woort ze beneump tot Ridder in de Orde vaan de Nederlandse Liew en tot Sportvrouw vaan 't Jaor 2006.

Bij 't EK allround vaan 2006 woort ze derde; 't jaor dao-op haolde ze de twiede plaots, kort achter Martina Sáblíková, die dèks häör concurrente zouw weure. In 't sezoen 2006/07 woort ze wereldbekerkampioen op de 1.000 en 1.500 meter. 't Jaor denao begós slech, doortot ze kort deveur de griep kraog. Later woort ze toch Europees Kampioen allround. Dezen titel had ze nog neet; sinds deen tied is ze de einegste Nederlandse die ziech kampioen op 't EK, WK en de Olympische Speule wèt. 't Jaor 2008/09 veel get tege; häör bèste rizzeltaot waor daarde op 't WK.

't Jaor dao-op begós alvas beter mèt de wins op de 1.000 meter op 't NK aofsten en de zèlvere medalje op 't EK allround. De Olympische Speule begóste evels maoteg: Wüst woort achste op de 1.000 meter en indegde es zevende bij de 3.000 meter, boe ze titelverdedegster waor. Väöl beter verleep de 1.500 meter: hei versloog ze favoriete wie Sáblíková, Kristina Croves en Christine Nesbitt en haolde ze häör twiede gouwe Olympische medalje.

Euvereg

Sinds oktober 2009 besteit in Tilburg 'n Ireen Wüst-iesbaon.

Persoenleke records

500 meter: 38,44 (9 fibberwarie 2007, Heerenveen)
1.000 meter: 1.13,83 (11 miert 2007, Salt Lake City)
1.500 meter: 1.52,38 (3 miert 2007, Calgary)
3.000 meter: 3.59,74 (9 miert 2007, Salt Lake City)
5.000 meter: 6.57,87 (13 jannewarie 2008, Kolomna)

Bron

Dit artikel is gebaseerd op, meh neet vertaold oet, 't corresponderend Nederlands artikel.