Humenné

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

de börch van Humenné

Humenné (Hóngaars: Homonna, Duutsj: Homenau) is 'n stad in 't oeaste van Slowakieje mit zoea 35.000 inwoonders.

Stadsbeeldj

Humenné ligk ane reveer de Laborec en huuert achter Košice en Michalovce toette grótter plaaysen in 't oeaste van 't landj. Inne binnestad is 'n vootgengerszaon wodoor me nao de börch kan gaon. In die börch, die door e park ómgaeve wuuert, bevindj zich e museum.

Wie in väöl anger plaatsen in 't oeaste van Slowakieje is Humenné godsdeenstelik hieël divers.

Gesjiechte

De ieëste sjriftelike vermeljing vanne stad, es Homonna, kump oet 1317. De stad woort dao-op 'ne langen tied (róndj 1320 toet 1684) nej verbónjen ane adellike femielje van groeatgróndjbezitters Drugetovci, die van Napolitaanse kómaaf wore. De stad enne börch woorte van häör de zetel.

Inne neugetieëndje ieëw kaam de femielje Andrássy oet Transsylvanië inne stad. In daen tied waas ikkenomische gruj en woorte väöl nuuj geboewe neergezatj. De stad richdje zich meis oppe landjboew, de ambachten ennen hanjel. In 1871 woort 'n iezerbaan nao de stad getroch wodoor d'n hanjel enne houtbewirking 'ne blujtied doormaakdje. Anen inj vanne ieëw kaam de ieëste bedriefskundige akkedemie van Oeasteriek-Hóngarieje inne stad. Humenné talj doe zoea veerdoezjendj inwoonders.

Inne twintjigste ieëw kaam 'n kultureel vernujing. De stad waas bekandj veure merten en buuerze. Dees óntwikkeling kaam toet 'ne stilstandj doren Ieëste Werreldoorlog. Op 23 november 1914 woor de stad veur 'ne korten tied bezatj door 't Russisch laeger. Op 9 mieërt 1915 trochte die zich aevel trögk euvere Karpate.

Toetaan 1956 waas Humenné mieër e bestuurlik wie 'n ikkenomisch centrum. Wie de febriek veur polyamide vaezels te make kaam, op vandaag 't bedrief Chemlon, begós de stad weer mit grujje.