Hoofiezer

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

'n Hoofiezer is 'n metale besjurming veure heuf van 'n hoofbieës, meis e paerd of 'nen aezel. 't Is e vlaak stök iezer mit gater, wodoorhaer d'n hoofsmeed naegel sluit veur 't iezer vas te maken anen hoof, 't beslaon. De vorm van 'n hoofiezer volg de randj vannen hoof, mit anen achterkantj 'n äöpening.

Hoofiezers verkómme det de heuf waere besjajig. Veural bie landj mit vöchtige gróndj waat de heuf zaach make mótte zie besjajiginge verkómme die kónne leie toet infecties.

't Haet ouch speciaal hoofiezers die veur anger inj waeren ingezatj. Zoea haet 't hoofiezers mit puntjen anen óngerkantj; hiemit kan e paerd euver 't ies loupen en zoea 'n sleej veurtrèkke.

Biegeluif

't Guuef e biegeluif euver hoofiezers. Me zaet det 't gelök bringk veur 'n hoofiezer baove de deur of ane sjouw te hange. Wie 't hoofiezer próntj mót hangen is aevel e puntj van discussie. Väöl luuj volgen allewiel de meneer van baove de revere: mit 't aope deil nao baove (wie 'n U) veur zoea 't gelök op te vange, angesóm zów juus pech bringe. Van aadshaer oet dieëj m'n in eder val in Mofert 't hoofiezer oppe Duutsje meneer hange: mit 't aope deil óngeraan, angesóm zówwe de iezers de vorm höbbe vanne häöre vannen duvel.