Universiteit vaan Harvard

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Harvard University in november 2019

De Universiteit vaan Harvard (Ingels: Harvard University) is 'n Amerikaonse privaote universiteit die veurnamelik ligk in Cambridge (Massachusetts). De Harvard Business School, same mit häör sportfaciliteite, ligk tegeneuver de res vaan de campus aon de Boston-kant vaan de revier de Charles. De Harvard Medical School ligk in ‘t medisch distrik Longwood, kortbij ‘t centrum vaan Boston, boe ‘n aontal bekinde gespecialiseerde hospitaole staon. ‘t Astronomische observatorium, ‘t Harvard Museum of Natural History en ‘t Arnold Arboretum zien ouch wereldwied bekind.

Harvard is ein vaan de meis prestigieuze universiteite in de wereld, mit hendeg hoege touwlaotingseise veur (aspirant-)studènte, hoeg kolleesjgelde, hoeg salarisse veur professore en ‘nen hoege kans op ‘ne good betaolde job nao ‘t behaole vaan de studie. De universiteit kint väöl gerenommeerde weitesjappers es professore aontrèkke die örges aanders in de Vereinegde Staote of ‘t boeteland ‘ne naom höbbe gemaak, boe-oonder versjèllende Nobelprieswinnaars. Harvard heet ouch de aajdste zomersjaol vaan de Vereinegde Staote (opgeriech in 1871), mie es 5.000 studente volge eder jaor cursusse in versjèllende vakgebede op de Harvard Summer School.

Versjèllende groete globaol oontwikkelinge zien begos in Harvard, wie beveurbeeld 't sociaol medium Facebook - wat op 4 fibberwarie 2004 woort opgeriech es medium wat in ierste instantie allein waor gemeind veur Harvard-studènte.