Experimint vaan Hershey-Chase
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Experiminte vaan Hershey-Chase waore 'ne serie experiminte die woorte oetgeveurd in 1952 door Alfred Hershey en Martha Chase. Ze bevestigde tot DNA 't genetisch materiaol waor, wat es ierste gedemonstreerd waor in 't experimint vaan Avery-MacLeod-McCarty in 1944. Dewijl DNA al sins 1869 bekind waor bij biologe dachte de mieste op dat momint tot proteine de informatie veur erfelekheid droge.
Hershey en Chase veurde hun experiminte oet op de T2 faag, e virus boevaan de struktuur zjus daoveur bekind waor gewore door electronemicroscopie. De faag besteit allein mer oet 'n eiwitsjèl boe-in genetisch materiaol zit. De faag infekteert 'n bacterie door ziech te hechte aon 't boetenste membraan en 't genetisch materiaol te injektere, boedoor de bacterie mier virusse geit producere, dewijl de eiwitsjèl vas blijf zitte aon 't membraan.
In 'n ierste experimint woort 't DNA vaan de fage mèt radioaktief Fosfor-32 gelabeled (fosfor is aonwezeg in DNA mer neet in eder vaan de 20 aminozoere boe proteine vaan gemaak zien). Ze lete de fage E. coli-bacterië infectere, en haolde toen de eiwitsjèl vaan 't membraan mèt 'ne blender en 'n centrifuug. Ze voonte tot de radioactieve tracer allein mer ziechbaar waor in de bacterie en neet in de eiwitsjèl.
In 'n twiede experimint woort de fage gelabeled mèt radioaktief Zwavel-35 (zwavel is aonwezeg in de aminozoere cysteïne en methionine, mer neet in DNA). Nao splitsing vaan de eiwitsjèl en de bacterie voonte ze tot de de tracer wel aonwezig woar in de eiwitsjèl, mer neet in de geïnfecteerde bacterië. Dit bevestigde tot 't genetisch materiaol wat de bacterië infecteerde DNA is.
Hershey deilde de Nobelpries veur Fysiologie of Medicijne vaan 1969 veur zien 'oontdèkking vaan de genetische struktuur vaan virusse'.
Literatuur
[bewirk | brón bewèrke]- Hershey, A.D. and Chase, M. (1952) Independent functions of viral protein and nucleic acid in growth of bacteriophage. J Gen Physiol. 36:39-56.