Europees Fiscaol Kompak

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Blauw: lidstaote vaan de Eurozone; automatisch deil vaan 't Europees Fiscaol Kompak. Duustergreun: EU-lidstaote die gein deil oetmake vaan de Eurozone mer wel 't TSCG höbbe geteikend. Paors: EU-lidstaote die 't TSCG neet höbbe geteikend (nao de Brexit allein nog meh Tsjechië).

't Europees Fiscaol Kompak (vaan 't Ingels European Fiscal Compact), ofwel 't Verdraag wat betröf stabiliteit, coördinatie en kontról in de ikkenomische en monetair unie (Ingels: Treaty on Stability, Coordination and Governance in the Economic and Monetary Union, aofgekort TSCG), is e verdraag wat op 2 miert 2012 geteikend is door alle lidstaote vaan de Europese Unie (EU), op Tsjechië en 't Vereineg Keuninkriek nao.

Nao 't verdraag weurt in versjèllende lidstaote mèt aander gengbaar bijnaome verweze, zoewie: 't Europees Fiskaolpak (vaan 't Duits: Europäischer Fiskalpakt), 't Europees Budgetair Pak (vaan 't Frans: Pacte budgétaire européen) en de Europese euverslaagsunie (vaan 't Nederlands: Europese Begrotingsunie). Same mèt 't Europees Stabiliteitsmechanisme waor 't Verdraag opgezat um de Europese sjöldecrisis tege te gaon.

In 't Verdraag is aofgesproke tot de deilnömmende len hun beslissinge die oetgaves, belesting en heffinge aongoon gezamelek käözes make. Veurstenders vaan 't Verdraag beargumenteerde tot dit väöl zal verbetere op 't gebeed vaan fiscaol polletiek, sociaol zekerheid en arbeidsmerretwètgeving. Tegestenders zien bang tot 't Verdraag zörg veur wiedgaond verlees vaan de soevereiniteit. Alle lidstaote mote oetindelek deil weure vaan 't Europees Fiscaol Kompak, op Tsjechië nao, wat 'n oetzoonderingspositie heet verkrege vaan de EU. Dit gold ouch veur 't Vereineg Keuninkriek veurtot 't oet de unie trooj.