Els Borst

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Els Borst

Dr. Else Borst-Eilers, algemein bekind es Els Borst (Amsterdam, 22 miert 1932 - Bilthoven, 8 fibberwarie 2014), waor 'n Nederlandse politica veur D66. Nao 'n loupbaon in de medische wereld woort ze in twie kabinètte achterein minister vaan Volksgezoondheid.

Leve[bewirk | brón bewèrke]

Borst studeerde geneeskunde aon de Universiteit vaan Amsterdam en promoveerde dao ouch. Tenao begós ze es dokter. Ze zouw later nog bezundere hoeglierer weure, zoewie mèt-directeur vaan 't UMC in Utrech en vice-veurzitter vaan de Gezoondheidsraod.

Al sinds 1968 waor ze lid vaan D66. Pas in 1994, op 62-jaorege leeftied, stapde ze de politiek in, wie ze gevraog woort veur häör partij in 't kabinèt-Kok I ('t ierste mauf kabinèt) te goon zitte. Ze waor d'n iersten dokter op Volksgezoondheid sinds 1972 Louis Struyt). 't Kabinèt, 't ierste zoonder de christeleke partije, veurde e groet aontal ethische veranderinge door, neet in 't minste in de zörg. Zoe woort oonder Borst aon de euthanasiewèt begós, en woorte dossiers euver weefsel vaan oongeborene en xenotransplantatie behandeld. Es dokter had ziech Borst ummer veur zoe'n veranderinge oetgesproke. Ouch de verkoup vaan alcohol en touwbak woort oonder häör ministersjap aongesjerp: veur alcohol woorte leeftiedscontroles verpliech en veur touwbak kaom de grens op zèstien jaor. Wijer lepe in dezen tied de koste veur de zörg hel op door de touwgenome vergrijzing. Umtot 't budget neet oonindeg kós weure verhoeg, oontstoonte lang wachlieste.

Veur de Twiede Kamerverkezinge vaan 1998 woort Borst nao väöre gezat es liestrèkker vaan D66. Häöre veurgenger Hans van Mierlo kundegde häör op 31 mei 1997 aon mèt de wäörd Het is een meisje geworden en we noemen haar Els. Bij de verkezinge verloor D66 10 zedele (vaan 24 nao 14). Umtot de aander 'mauf' partije PvdA en VVD evels wonne, besloot me, nao 'n formatie boebij Borst in naom vaan D66 oonderhandelde, wijer te goon mèt e twiede mauf kabinèt. Hei-in woort Borst obbenuits minister vaan Volksgezoondheid, en noe ouch vice-premier.

In häör twiede termijn euverleefde Borst twie kier 'n motie vaan wantrouwe. D'n ierste kier góng 't um häör rol in d'n aofloup vaan de Bijlmerramp; de hölpverlieners bij dees ramp (nog väör häör ministersjap gebäörd) lepe massaol mèt klachte roond en me voont tot ze dao neet good mèt waor umgegaange. De twiede kier voolte de christeleke partije ziech geraak, umtot ze, wie de euthanasiewèt in 2001 indelek waor aongenome, in 'n interview (oetgerekend op Goje Vriedag) had gezag het is volbracht. Bei moties euverleefde ze.

Nao häör ministersjap trok ze ziech trök oet de politiek, meh op 21 december 2012 woort ze nog wel beneump tot Minister vaan Staot.

Op 10 fibberwarie woort Borst doed gevoonde in de garaasj vaan häöre villa in Bilthoven. Häören doed bleek neet natuurlek te zien; nao wijer oonderzeuk góng de pelitie oet vaan e misdrief.[1] De maond dao-op raakde de zaak neet opgelos; wel wis de pelitie te zègke tot de politica al kort nao häöre toeskoms mós zien umgebrach.[2] In 't vervolgoonderzeuk wis de pelitie relationeel oerzake of 'nen oet de haand geloupe inbraok oet te slete; me dach daorum 'ne maordeneer mèt 'n psychische steurnis. Op 7 oktober 2014 kaom de zaak in Opsporing Verzocht op de tv.[3] Eint en aandert veurde nao 'ne psychatrische patiënt, dee in jannewarie 2015 woort aongehawwe in verband mèt 'n aander maordzaak.[4] In fibberwarie 2016 bekós de verdachte de maord en verklaorde heiveur e religieus motief te höbbe (de bovegeneumde Euthanasiewèt).[5]

Bron[bewirk | brón bewèrke]

Dit artikel is vertaold oet 't corresponderend Nederlandstaoleg artikel.

Rifferenties[bewirk | brón bewèrke]

  1. Nu.nl - Politie: Els Borst waarschijnlijk door misdrijf overleden
  2. Nu.nl - Els Borst lag twee dagen dood in garage
  3. Opsporing Verzocht - Bilthoven - Dood oud-minister Els Borst- Eilers (81) in haar woning aan de Ruysdaellaan
  4. Nu.nl - 38-jarige man in beeld in zaak Els Borst na DNA-match
  5. Nu.nl - Bart van U. bekent moord op oud-minister Els Borst
Commons
In de categorie Els Borst van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Els_Borst&oldid=433798"