El Niño

Van Wikipedia
Gank nao: navigatie, zeuke

Dit artikel is gesjreve in 't Mofers. 't Weurt gewaardeerd óm in dit artikel 't Mofers aan te hauwe of aan te gaeve welk anger dialek gebroek is.


De El Niño van 1997 waar de litste sterke.

El Niño is e klimatologisch versjiensel det veurkump inne Groeaten Oceaan langs d'n aevener. 't Hèltj 'n sterke opwerming van normaal keul zieëwater in die 'ne groeaten invlood haet op 't waer in groeate deiler vanne werreld. El Niño kan óntstaon es in 't oeaste vanne Groeaten Oceaan mieë werm water is es normaal. De passaatwinj duje den kóntinu 't oppervlakdjewater det dore zón opgewurmp is gewaore inne richting van Indonesië. Dao óntsteitj den 'n diekke laog aan werm water dewiel langs de kös van Peru juus keul water versjientj. 't Wermer water mót vervolges trögkgeduujdj waere nao Zuud-Amerika. Sómtieds guuef 't dao inne raengertied (oktoeaber toet aan april) wèstelike störm die taenge de richting vanne passaat in 't water trögkduje nao Zuud-Amerika. Zoea hèltj de opwurming zich dao in standj en kump 'nen El Niño.

'n Zuud-Amerika haet El Niño zwaor raenges toet gevolg die drekstruim en lwiens kónne veroearzake. Wiejer höbbe visjers dao ouch väöl las d'rvan. In normaal jaore struimp keul water vanoet 't voorriek Antarctica wodoor plankton en visse zich good veurtplantje. Bie 'n El-Niñojaor struimp wermer, minder-voorriek water vanoete Filipiene, wodoor de visstandj behuuerlik vèltj. In Australië en Indonesië geldj det El Niño druuegdje, en dus 'ne slechten ougs en bósbrenj, mit zich mitbringk.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=El_Niño&oldid=373740"