Eechel
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
- Stekelzwien kump oet op dees pagina. Veure pagina euvere biologische femielje (Hystricidae); zuuch: stekelzwiender.
d'n Eechel of e staekelverke (Erinaceus europaeus) is 'n algemein, wiedverspriedj zougdeer oete femielje vanne eechele (Erinaceidae). d'n Eechel is 'n bekèndje versjiening in häöf in Wès-Europa. Hae is veural bekèndj veur zien staekelige vach en zien gewuuendje zich bie gevaor op te rolle.
De lingdje is óngevieër 22,5 toet 27,5 cm. Eechelen höbben 'ne stert van 15 toet 30 mm en waere 12 toet 15 cm hoeag. Ze waere maximaal 8 toet 10 jaor aad in gevangesjap, mer inne netuur zoeaget 4 toet 6 jaor. 't Gewich ligk tösse de 400 en 1200 gram. De rögk vannen eechel is bedèk mit róndje 6000 stekele, mer is kansloeas taenge wages. Hae wusseltj zien stekele zeljen en ónregelmaesig; gemiddeldj gaon de stekele zoea 18 maondj mit. Eechele höbbe döks e kènmirkendj petroean inne stekele.
't Dieet besteitj oet (naaks)slek, wörm en insekte wie mèskaeveren en roepse; eechele zeen daomit nöttige helpers inne bestriejing van óndere. Ouch aete ze spinnen en 'nen inkele kieër ouch klein gewèrveldje bieëster wie kwekkerten, aektese, jóng knaagdere, veugeleier en aos, of plantjaerdig voor wie vröchten en duvelsvleis. Bewaeringe det t'r ouch slange kan doeaje zeen noeatj beweze gewaore. Eechel zeen nachdere die gemiddeldj zoea 70 g voor de nach aete.