Deliberatief democratie

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Deliberatieve democratie riffereert nao de vörm vaan democratisch en pebliek besleetvörming boe-in 't vergare vaan informatie, euverlègk en 't oetwissele vaan argumènte centraol staon. 't Bezej woort veur 't iers gebruuk door Joseph M. Bessette in 1981. Belaangrieke dènkers die aon 't fundamint vaan 't konsep deliberatieve democratie stoon zien oonder aandere d'n Dusseldörpse filosoof Jürgen Habermas en de socioloog John Rawls.

Deliberatieve democratie is 'n alternatief veur direkde democratie, mer ouch veur 't meis bekènd democratisch model in Europa, naomelek representatieve democratie. Wijl in de direkde democratie alle börgers mètbeslete euver bepaolde kwesties, dèks via referenda, verkeze börgers in 'n representatieve democratie hun vertegewuurdegers oet die 'n mandaot kriege um in naom vaan 't volk polletieke beslissinge te make. Bij deliberatieve democratie is 't buut evels um mèt 'nen diverse en groete gróp börgers (dèks bestande oet börgers die zien oetgeloot door 'n representatieve loting) tot e polletiek besleet komme, naotot börgers adequaot zien geïnformeerd euver de problematiek en de nudege tied krijge um mèt mekaar te euverlègke euver de bes meugeleke oplossing. Börgers delegere dus neet 't besleetsvörmingsperses nao politici (zoewie dat wel 't geval is in 't allewijl, representatief, system). Vaan börgers weurt tegeliekertied ouch neet verwach tot zie metein 'n individueel oerdeil klaor höbbe (wie dat wel vaan hun weurt gevraog in referenda).

Besleetvörming oontsteit op force vaan de theorie vaan deliberatieve democratie in e kollektief perses boebij argumentatie centraol steit. Dit euverlègk veend plaots in rillatief klein grupkes um daodwèrkelek actieve participatie en oetwisseling vaan argumènte te promote. Bij deliberatieve democratie zien betrokkeheid op 't algemein belang en 't verzekere vaan 'n gelieke stöm vaan aander deilnömmers in 't besleetsvörmingsperses centraol illemènte.

Brón: Nederlandstaolge Wikipedia