De Peel in brand

Van Wikipedia
Naar navigatie springen Naar zoeken springen
Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Amerikaans, es te dit dialek sjpriks.

"De Peel in brand" (oersprunkelek gesjreve es De Piël in brand) is e leed vaan de Nederlands-Limbörgse band Rowwen Hèze. 't Is ein vaan hun populairste nommers. Wie gebrukelek koume de teks en meziek vaan zenger Jack Poels. 't Kump oersprunkelek vaan hun debuutalbum Rowwen Hèze, meh is later in versjèllende versies opgenome gewore.

Teks[bewirk | brón bewèrke]

D'n teks besjrijf de ervaoringe vaan de zenger, dee es keend 'ne zonsoondergaank mèt lieghaangende mis zaog en meinde tot de Pieël in brand stoont. En passant besjrijf heer ouch aander herinneringe aon zien jäög, wie heer beveurbeeld in zien fantasie edereine de baas waor.

Meziek en versies[bewirk | brón bewèrke]

De oersprunkeleke versie (in 1985 op cassèt, in 1987 op grammofoonplaat) waor mid-tempo en carnavalesk, mèt 'ne beat droonder. Väöl bekinder en geleefder evels woort de versie die in 1991 oetkaom op 't album Boem. Dit is 'n folkversie boe-in Poels ziech begeleit mèt allein de akoestische gitaar. Dit leed sloog zier aon en woort dèks es touwgif gespäöld. Me kin dees versie ouch vinde op de compilatie-cd Kilomeaters - 't Beste van 20 joar, die in 2005 door stumming oonder de fans is samegestèld. Datzelfde jaor versjeen 't leedsje ouch op single. Nog 'n aander versie woort gespäöld in de Saus-tour, boevaan ouch 'n cd en dvd zien versjene. Hei weurt de gitaar aongevöld mèt steelgitaar en blozers.

De Heideroosjes, aofkumsteg oet naoberdörp Haors, höbbe 't leed gecoverd in 'n punkversie. Dees versie is terech gekoume op Manne van staal, e compilatie-album boe me diverse covers vaan Rowwen Hèzesongs zoewie oonoetgebrach werk bijein vint.

Me kin Jack Poels ummer hure zinge vaan de Pieël, neet de Peel, dee in brand steit. Oersprunkelek waor d'n titel ouch De Piël in brand. Me heet dit nao d'n doorbraok boete Limbörg veranderd um grepkes veur te zien (Hollands piel is 'pum').

Succes[bewirk | brón bewèrke]

't Leed heet sinds 't begin vaan de Limbo Top 100 altied hoeg gestande. In 2006 en 2007 haolde 't zelfs de nommer 1-positie. Rowwen Hèze haolde ieder al de boveste plaots mèt 't Roeje klied en November. Ouch de Heideroosjesversie heet eine kier de Limbo Top 100 gehaold, en wel in 2014 (nommer 68).[1] De single vaan 2005 haolde de 34e plaots in de Top 40. Ouch in de Top 2000 kump 't sinds 2013 oonaofgebroke veur (in 2015 op de 900e positie).[2]

Bronne[bewirk | brón bewèrke]

Rifferenties[bewirk | brón bewèrke]

  1. Limbo Top 100 2014
  2. Radio 2 - De Peel in brand
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=De_Peel_in_brand&oldid=409758"