Folk

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Folk ('n verkorting vaan 't Ingels folk music volksmeziek) is e meziekgenre wat besteit oet in principe Westerse, väölal Amerikaanse volksmeziek, of (pop)meziek die dao sterk op gebaseerd is. Soms weurt ouch wel vaan roots(meziek) gesproke. Veur meziek vaan boete de Angelsaksische traditie sprik me liever vaan wereldmeziek. Kinmerke vaan 't genre zien vrij simpel leedsjes (dèks majeur mèt drei akoorde) en 'n akoestische begeleiding, die dèks allein oet 'n akoestische gitaar besteit. Aander instrumente die veurbij kinne koume zien de banjo, de viool, de contrabas en de trèkzak, al nao gelaank 't (sub)genre. Folkmeziek leefde in de VS langen tied oonder de radar, op 't platteland, meh kraog wel aondach in 't Great American Songbook, 'n collectie op 't platteland gezoonge meziek vaan versjèllende aofkomste. In 't Interbellum woort de meziek commercieel op grammofoonplate oetgebrach in genres wie hillbilly music en blues, veur respectievelek de blaanke en de zwarte op 't platteland. Zoewel hillbilly (country) es blues zouwe tot apaarte genres oetgreuje; de folkechtege variant van country neump me allewijl bluegrass.

In de jaore roond d'n Twiede Wereldoorlog kraog de meziek veur 't iers brei aondach in intellectuele wereld wie Woodie Guthrie de leedsjes vaan 't Songbook góng opnumme en zelf ouch nui werk in dat idioom oetbrach. Roond 1960 had 't Kingston Trio oonder studente väöl succes mèt zien covers vaan volksleedsjes. De groeten doorbraok kaom evels mèt Bob Dylan, begós es naovolger vaan Guthrie, dee mèt zien dèks maotsjappelek geëngageerde leedsjes 'ne crossover nao de popmeziekwereld tot stand brach. Zie veurbeeld woort op groete sjaol naogevolg en Dylan ziene meziek woort populair oonder de hippie-subcultuur. Ouch wienie heer later de folkrock oontwikkelde (en mèt oonder mie The Band góng wèrke), bleef zienen invlood op de popmeziek groet. Folk heet sindsdeen 'ne wisselende rol in de popmeziek gespäöld; de groetste revival kaom sindsdeen aon 't begin vaan de jaore 2010.


  Dit artikel is e sjtumpke. De kans Wikipedia helpe door 't aan te völle

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Folk&oldid=411009"