D'n Deelgaard

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Deelgaards, es te dit dialek sjpriks.

D'n Deelgaard (Nederlands: Maria-Hoop) is 'n dörp in de Nederlands-Limburgse gemeinte Ech-Zöstere, aon de grens mèt Duutsland, t'n ooste vaan Ech en Pej en ten zuie vaan Mofert. Mèt oongeveer 1400 inwoeners is 't ein vaan de kleiner kerne in de gemeinte, allewel tot 't groondoppervlak 't groats vaan alle kerne is. Bie D'n Deelgaard huert ouch de naobersjap D'n Echterbós (Echterbosch). D'n Deelgaard heet 't karakter vaan e lintdörp.

D'n Deelgaard vörmp 'n zelfstendege parochie; besjèrmvrouw is Maria, Mojer vaan de H. Houp. 't Mis evels eder vörm vaan middestand. Bovedeen is de kern de leste jaore sterk vergrijs.

Bij D'n Deelgaard ligk 'ne kestielheuvel oet de twelfde iew, dee de Bolleberg geneump weurt en veural es archeologische vindplaots vaan belaank is. In 1931 kaom de plaots negatief in de publiciteit door 'ne miervoudege maord gepleeg door 'ne jaeger. De naam Maria-Hoop is pas in 1953 ingeveurd; daoveur hètde de plaots offesjeel Diergaarde.