Che Guevara

Van Wikipedia
Gank nao: navigatie, zeuke

Dit artikel is gesjreve in 't Mofers. 't Weurt gewaardeerd óm in dit artikel 't Mofers aan te hauwe of aan te gaeve welk anger dialek gebroek is.


Che Guevara.

Ernesto Guevara (Rosario, Argentinië, 14 mei of 14 juni 1928 - La Higuera (Bolivië), 9 oktoeaber 1967), baeter bekèndj ónger naam Che Guevara, waas 'nen Argentiense marxistische rivveluusjenaer en 'ne Cubaanse guerrillaleier. De bienaam Che kreeg t'r tiejes zie verblief in Guatemala. In Letiens-Amerika wuuertj de kreet "Che" gebroek veur emes zienen aandach te trèkke; 't kan vrie waeren euvergezatte nao "vrundj" of "maot". "Che" wuuertj ouch gebroek es bienaam veur emes oet Argentinië.

Che Guevara waas e lid van Fidel Castro zien Rivveluusjenaer Bewaeging vanne 26e juli, die in 1959 op Cuba via 'n rivveluusje ane mach koom. Nao versjillige posten inne nuuj Cubaanse regering te höbbe beklèdj, verleet Guevara Cuba in 1966 veure rivveluusje in anger lenjer te verspreie; ieës in Kongo-Kinshasa en later in Bolivië. Op 8 oktoeaber 1967 woort Guevara opgepak tiejes 'n militair operatie dore CIA georganiseerdj van 't Boliviaans leger. Trótsdet de CIA 'm veur óngervraoging in laeve wól haje, woort Guevara d'n daag nao zien gevangenaam geëxecuteerdj. In juli 1997 zeen de euverbliefsele van Guevara en zès van zien kammeräöj nao Cuba euvergebrach gewaoren en in oktoeaber 1997 mit militairen ieër biegezatte in e mausoleum in Santa Clara.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Che_Guevara&oldid=364407"