Blazoen van Nederlands Limburg

Van Wikipedia
Gank nao: navigatie, zeuke

Dit artikel is gesjreve in 't Mofers. 't Weurt gewaardeerd óm in dit artikel 't Mofers aan te hauwe of aan te gaeve welk anger dialek gebroek is.


`t Blazoen van Nederlands Limburg

Heraldische besjrieving[bewirk | brontekst bewerken]

" `n Geveredeild sjildj; `t ieërste kwarteer in zilver `ne van goud gekroonde en geklauwde leeuw van kael mit dubbele stert; `t twieëde kwarteer in goud `ne van kael getóngde en geklauwde ongekroonde leeuw van sabel; `t derde kwarteer in goud drie häöres van kael, geplaats twieë en ein, en veurzeen van benj van zilver; `t veerde kwarteer in lazoer `ne leeuw van goud mit dubbele stert, getóngd van kael, gekroond en geklauwd van goud; euver alles haen `n hertsjildj van zilver belaje mit `n van goud gekroonden en geklauwden leeuw van kael mit dubbele stert. `t sjildj gedèk mitte Limburgse hertogelikke hood of kroon."

Verklaoring[bewirk | brontekst bewerken]

`t Blazoen of waope van Limburg besteit oet veer kwartere en e hertsjildj. Alle deile van `t waope symbolisere `n bepaold gebied, waat vreuger in de huidige provincie loog. `t Hertsjildj is `ne Limburgse leeuw. `t Is `t waope van `t vreugere Hertogdom Limburg mit es hoofdstad de stad Limburg bie Luuk. `t Ieërste kwarteer is `t waope vanne Hieërlikheid Valkeberg. Dit is geliek aan `t waope van `t Hertogdom Limburg, ómdet Valkeberg vreuger `n lieën van Limburg is gewaes. `t Twieëde kwarteer is `ne Gulikse leeuw. Versjillende plaatse in `t noorde van Zuid-Limburg en in Midde-Limburg behuuerde vreuger toet `t Hertogdom Gulik. Deze leeuw is auch truuk te vinje in `t waope vanne stad Gulik (Jülich). De poshäöres in `t derde kwarteer kómme oet `t waope vanne Graafsjap Häör. `t Lèste kwarteer leut `ne Gelderse leeuw zeen. Groeate deile van Noord- en Midde-Limburg behuuerde vreuger toet Gelder. De hertogelikke kroean weurd gebroek, ómdet Limburg van 1839 toet 1866 `n soeverein hertogdom waas.

Gesjiedenis[bewirk | brontekst bewerken]

Op 27 december 1886 verlieënde Keuning Wullem III bie keuninklik besloet dit waope ane provincie Limburg.