Betuwe

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


De Linge tösse Rumpt en Beesd inne Betuwe.

De Betuwe is 'n streek inne Nederlandjse pervincie Gelderlandj, gelaenge tösse de Waal in 't zujen enne Nederrijn enne Lek in 't naorde.

De Linge struimp van oeas nao wès dore Betuwe. De stad Tiel haet de wichtigste regiofunctie in dit reverelandj. Anger grótter plaatse zeen Culemborg en Geldermalsen. De Betuwe steitj veural bekèndj veur zien groeatsjaoligen tuinboew, worónger de fruitteelt. De oearzaak van det landjgebroek ligk inne geologie enne baomgestèldjheid van 't gebied. De Betuwe besteitj oet 'n aafwusseling van aaj struimgäöle, de struimrögken aanw aersziej daovan enne kómgrunj wiejeraaf vanne reveer. Dees aaj reveerluipe zeen op väöl plaatsen in 't landjsjap, ouch binne d'n diek, nag good te herkènne. Mit naam de struimrögke mit get zanjig matterjaal zeen uters gesjik veuren tuinboew en fruitteelt en vörme de bèste landjboewgrunj van Nederlandj.

Euvere herkóms vanne naam Betuwe is väöl discussie. Zoea wuuertj gestèldj det 't waord oearsprunkelik "goje gróndj" mèntj. Det steitj den taengeneuver de Veluwe: "slechte gróndj". Die verklaoring is aevel door weitesjappers verwórpe. 'n Anger verklaoring zów kónne zeen det de naam is aafgelèdj vanne Bataviere, die in dit gebied häör kernlandj hejje.

Inne Romeinsen tied leep de Limes, de Romeinse rieksgrens, langs de Aje Rien enne Nederrijn. In väöl Betuwse plaatse zeen Romeinse vónjste gedaon. In Elst woorte merleefs drie tempelen opgegrave: ein in 't gebied Westeraam en twieë óngere kirk. De streek behuuerdje inne Middelieëven en vreugmodernen tied groeatendeils toet 't Keteer van Nimwaege, ei vanne veer ketere van 't aad Hertogdóm Gelder.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Betuwe&oldid=361101"