Baereneilandj

Van Wikipedia
(Doorverweze van Bereneiland)

Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.


Ligking van 't Baereneilandj.

Baereneilandj (Noors: Bjørnøya) is 'n eilandj det óngevièr hauverwaeges van Spitsberge en de Naordkaap ligk; tösse de Noorse Ziè en de Barentszziè. Administratief maak 't deil oet van Spitsberge, det ónger Noorwaeg vèltj. Me mót dit eilandj neet verwarre mit de Rössische Baereneilenj, die wiejer nao 't oaste ligke.

Restantje van de waalvèsjvaart.

De awdste deiler van 't eilandj, in 't zuje, zeen 600 toet 1.000 miljoen jaor awd. De jungste deiler datere oet 't Trias, 210 toet 245 miljoen jaor trögk. De baom besteit oet sedimentaire stein. Väöl rotse bevatte fossiele. Op hoager deiler aan de zuudkantj bevindj zich 'n törflaog van inkel maeters diek, die zoa 9000 jaor awd is. 't Zujelik deil van 't eilandj is bergechtig. Anges es op Spitsberge kómme hie gein gletsjers veur. De kus is gemeinelik vrie stiel mit hoag kliffe. Op 'n paar plaatse geuf 't zandjstenj. In 't zuje zeen divers grotte en óngergrundjse reveerkes.

't Eilandj haet e gemaesig poalklimaat mit 'n rilletief gemaesigdje temperatuur in de wintjer. De poalnach begintj op 8 november en doertj toet 3 fibberwarie; de middernachzón sjientj van 2 mei toet 11 augustus.

't Baereneilandj haet e vrie kaal landjsjap. 't Geuf koum plantjgreuj dao. Zoa 150 saorte aan mos en 54 hoager plantjsaorte greuje dao, mer gein buim of struuk.

't Eilandj is vreuger gebroek gewaore veur de jach op waalrösse, esouch veur de waalvèsjvaart.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Baereneilandj&oldid=420327"