Bart Carlier

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


Bart Carlier in 1955

Anthonius Hubertus Carlier (Venlo, 23 juni 1929 - Sjtraasburg, 4 mei 2017) waor 'ne Nederlandjse voetballer dae veurnamelik in de jaore 50 en 60 es prof actief waas in de Nederlandjse, Duutsje en Franse voetbalcompetities. Hae sjpeelde vief interlands veur 't Nederlands Èlftal en maakde hiebiej tweë gole. Carlier woort gebaore in Venlo. Zien femielie – awwesj, jónger zöster en awwere broor Willy dae ouch 'ne getalenteerd voetballer waas – is in de Tweëde Waereldaorlog biej ein bómbardemènt van 't militair vleegveldj Venlo-Herongen op 15 augustus 1944 óm 't laeve gekómme. [1]

Clubcarrière[bewirk | brón bewèrke]

Bart Carlier waas eine lènksbeinige voetballer en haet zien ganse loupbaan es lènksboete gesjpeeld. Hae begoosj zien carrière biej VVV-Venlo. In 1952 góng hae nao Duutsjlandj wo hae tweë sezoene in de Oberliga Wes sjpeelde veur de 1 FC Köln. Hae maakde ach gole in ach wedsjtrieje. In 't eësjte jaor woort hae mèt Kölle tweëde en naom hae mèt dees ploog deil aan de eindjrunj veur 't nationaal kampioensjap. Veur aanvank van 't sezoen 1953-1954 maakde hae mèt ziene trainer Helmut Schneider oet Müngersdorf de euversjtap nao FK Pirmasens dat sjpeelde in de Oberliga Zuud-Wes.

Na ein jaor in de Pfalz te höbbe gesjpeeld góng hae nao Frankriek wo hae ging sjpele veur Racing Straatsburg. Wiej in 1954 't profvoetbal in Nederlandj van sjtart góng, woort hae aangetrokke door 't ambitieuze Fortuna '54 van Gied Joosten oet Gelaen. Hae sjpeelde hiej drie sezoene mèt anger Nederlandjse topvoetballersj zoaes Frans de Munck, Cor van der Hart, Bram Appel en Jan Notermans. In daen tied waas Fortuna de bèsbetalende club van Nederlandj. In 1957 woort hae mèt Fortuna tweëde in de competitie en behaolde hae mèt de club de KNVB-baeker. In dees periood maakde hae ouch zien debuut veur 't Nederlands Èlftal. Veur aanvank van 't sezoen 1958/1959 góng hae truk nao Frankriek en góng sjpele veur AS Monaco. Mèt dees club behaolde hae zien groatste successe; in 1960 woort de Franse baeker gewónne en in 1961 woort 't landjskampioensjap gevierd. In 1963 waas 't succes nog groater door 't behaole van de döbbel, zoawaal de baeker es 't landjskampioensjap woorte bènnegesjleip. In 1964 keërde hae truk nao Fortuna ’54 wo hae ein jaor later zien voetbalcarrière aafsjloot.

Nederlandjs Èlftal[bewirk | brón bewèrke]

Carlier maakde op 26-jaorige laeftied zien debuut veur 't Nederlandjs Èlftal op 6 november 1955 ónger bóndjscoach Max Merkel taenge Noorwege. In dit èlftal sjtónge ouch zien clubgenote Bram Appel, Frans de Munck en Cor van der Hart opgesjtèld. Zien eësjte gool veur Oranje maakde hae in ziene tweëde inerlandj taenge Belsj. Hae sjpeelde in totaal vief wedsjtrieje veur Oranje en scoorde tweë keër.

Clubs[bewirk | brón bewèrke]

Sjtatistiek[bewirk | brón bewèrke]

  • 5 interlandjs; 2 gole
  • Oberliga West: 8 wedsjtrieje; 8 gole
  • 1. Liga Frankriek: 197 wedsjtrieje; 48 gole

Successe[bewirk | brón bewèrke]

  • 1957 KNVB-baeker mèt Fortuna ‘54
  • 1960 Franse baeker mèt AS Monaco
  • 1961 Frans kampioensjap mèt AS Monaco
  • 1963 Frans kampioensjap mèt AS Monaco
  • 1963 Franse baeker mèt AS Monaco

Zuug ouch[bewirk | brón bewèrke]

Referentie[bewirk | brón bewèrke]

  1. Oorlogsdoden Venlo 1940-1949, Herdènking van de Venlose Aorlogssjlachoffersj gevalle biej 't bómbardemènt in 1944
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Bart_Carlier&oldid=438996"