Baoksem

Dit artikel is gesjreve (of begós) in 't Baoksems. Laes hie wie v'r mit de versjillende saorte Limburgs ómgaon.

---

Baoksem (Baexem) Gewaeze gemeinte in Nederlandj
{{{locatie}}}
Gevörmp	?
Opgehaeve	1991
Opgegange in	Heitse
Provincie	Nederlands Limbörg
Hoofplaats	Baoksem
Opperflaakde (bie opluffing)	9,01 km²
– daovan water:	0,03 km²
Inwoeners (kort veur opluffing)	1.635 (1971)
– deechde:	181/km²
Lies van börgemeisters

De kirk van Baoksem

Baoksem (sjpelling volges Veldeke, plaatselik meistal gesjpeldj as Boaksum, Nederlands: Baexem) is ein dörp in de Nederlands-Limburgse gemèndje Luëdal (Leudal), ten zuide van 't dörp Heitse, mèt (1 januari 2006) 2854 inwoeëners.

Bie Baoksem vinj se 't Kesjtieël Baoksem, twieë kloeësters en de windjmäöle "Aurora". De kèrk is nao de aorlog óntworpe door Alphons Boosten en waas in 1950 vaerdig.

Baoksem loog vreuger in 't Landj van Thoeër en haaj dao 'n eige sjepebank. In 't Käöninkriek van de Nederlenj waas 't 'n zelfsjtenjige gemèndje, toet 't in 1991 bié Heitse ingedeildj waerdje. Vanaaf 2007 huërtj 't bie de noe gemèndje Luëdal.

Waope

---

De volgende sectie van dit artikel is gesjreve in 't Mestreechs.

---

Baoksem kraog op 24 juni 1929 vaan d'n Hoege Raod vaan Adel e waope touwgekind, wat ziech zoe liet umsjrieve:

In sinopel (greun) twie golvende dweersbelk vaan zèlver (wit) en e vrijkerteer: geverendeild: I. en IV. in goud 'ne liew vaan keel (roed), genageld en getóngk vaan lazuur (blauw), II. en III. in zèlver 'nen dobbelstartege liew vaan keel, gekroend en genageld vaan goud; achter 't sjèld stoonde en mèt de linkererm drop röstend de figuur vaan Sint-Jan-d'n-Duiper, gekleid vaan kemelshaor mèt 'ne lere gordel um de heupe, alles vaan natuurleke kleur, dragend op de rechtererm e zèlvere laam en hawwend in de linkerhand 'ne kruusstaaf in natuurleke kleur, boe-aon oonder 't kruus e veendelke vaan zèlver zit.

Allewel tot Baoksem vreuger, same mèt Gratem, 'ne sjepebaank vörmde, is vaan dee baank gei zegel bekind; vaan de parochie ouch neet. Daorum heet me e nui waope mote bekinde. Dit waope is sprekend: 'n courante verklaoring lègk de naom vaan 't dörp es bach-heim oet, de dweersbelk vaan zèlver zien de beke boe Baoksem aon ligk. 't Vrijkerteer is 't waope vaan 't voorstedom Toear boe Baoksem in laog, Sint-Jan is de petroenheilege vaan 't dörp.

Historische inwoenertalle

Jaor Aontal Greuj (gans Limbörg) 1830 476 -- 1840 536 +12,6% (+5,6%) 1849 548 +2,2% (+4,3%) 1859 580 +5,8% (+4,4%) 1869 647 +11,6% (+4,5%) 1879 702 +8,5% (+7,0%) 1889 660 -6,0% (+6,8%) 1899 670 +1,5% (+10,2%)

Jaor Aontal Greuj (gans Limbörg) 1909 725 +8,2% (+17,8%) 1920 899 +24,0% (+32,6%) 1930 926 +3,0% (+25,1%) 1947 1.249 +34,9% (+24,2%) 1956 1.348 +7,9% (+27,3%) 1960 1.459 +8,2% (+7,4%) 1971 1.635 +12% (+13,9%)

Opmerking

• In de volkstèlling vaan 1971 zien de inwoenertalle op ganse vieftalle aofgeroond. Gelèt op 't klein aontal inwoeners vaan Baoksem is daorum 't greujpercentaasj neet exakter es in ganse percinte.

Rillatief oontwikkeling vaan 1830 tot 1971

(v₁₈₃₀=100)

Greun: Gemeinte Baoksem
Blauw: Provincie Limbörg