Significante ciefers

Van Wikipedia

Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.


't Idee van significante ciefers is 't oetdrökke van de nejkeurigheid in 'n maeting. De significante ciefers van 'n maetwaerd zeen de ciefers die beteikenis höbbe veur de nejkeurigheid van de waerd. De nejkeurigheid van 'n maeting kan me den ouch aaflaeze aan 't aantaal significante ciefers.

't Aantaal significante ciefers van 'n maetwaerd is euver 't algemein 't aantaal ciefers zónger op de komma te litte. Nólle aan de begin van machte van tièn tèlle neet mit. Sómtieds is es gevolg van ein of miè beraekeninge 'n maetwaerd in miè ciefers gegaove es de nejkeurigheid toeleet. De mins-nejkeurige maetwaerd bepaoltj de nejkeurigheid van de oetkóms.

't Significantste ciefer is 't "ièste" ciefer van e getaal ('t ciefer 't meis aan de linkse kantj, meh noatj nól). 't Ónsignificantste ciefer is 't "litste" ciefer van 't getaal (meistes, meh neet ummer, is det 't litste ciefer). E ciefer wuèrtj significanter geneump es 't miè significantie of gewich haet. In 't decimaal (tièntalig) stèlsel nump 't gewich van edert ciefer nao links ederskièr toe mit 'ne factor tièn. Nao rechs nump 't gewich ederskièr aaf mit 'ne factor tièn. Get vergeliekbaars gebeurt in 't binaer (twiètalig) stèlsel. Dao sprèk me van de (ón)significantste bit (lsb, msb).

Sómtieds wuèrt de term "significante ciefers" gebroek es 'n saort aan voesregel in e weitesjappelik experiment of in de stattestiek worin perfekte nejkeurigheid ónmeugelik of ónnuèdig is. Door te kieke wie de ónzekerheje in 't experiment doorwirke in 't rizzeltaot, wuèrt de ónzekerheid in 't rizzeltaot (significantie) beraekendj.

't Kóncep van significante ciefers is aafkumstig van 't maete mit analoog maetinstermenter. Veurbild: de lingdje van e veurwirp wuèrt gemaete mit 'ne liniaal mit 'n sjaolverdeiling in millimaeters. De lingdje bliek tösje de zès en zeve millimaeter te ligke en me kan zeen det 't óngevièr op twièderdje van d'n aafstandj tösje bei ligk. 'n Acceptabel maetrizzeltaot is den 6,6 mm of 6,7 mm, meh neet 6,666666 mm. Dit litste zów namelik t'n onrech 'n väöl grótter maetnejkeurigheid suggere es mit dees maetmethood (liniaal) meugelik is.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Significante_ciefers&oldid=376321"