Amstel Gold Race 2021

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

D'n Amstel Gold Race 2021 woort gehawwe op 18 aprèl 2021. 't Waor de 55e editie vaan d'n Amstel Gold Race. Naotot de race in 2020 neet kós weure gevare um de COVID-19-pandemie, gaof 't 't jaor dao-op um dezelfde rei 'ne zwoer aongepasde vörm.

Parcours

Umtot bij de race gei pebliek welkom waor, mós me 't parcours aofzètte. Dit maakde e doorloupend parcours vaan 260 kilometer zoe good wie oonmeugelek. Me zat daorum e rundsje oet vaan 16,9 kilometer tösse Valkeberg en Mestreech. De manslui fietsde dit daartien kier, de vrouwlui zeve kier. In eder rundsje gaof 't drei beklumminge: de Cauberg, de Geulemerberg en de Biemelerberg.

Race vaan de vrouwlui

Verluip

In de loup vaan de race vörmde ziech e kopgrupke. Vlöchte vaan oonder mie Grace Brown en Pauliena Rooijakkers mislökde. Bij de lèste beklumming vaan de Cauberg fietsde Katarzyna Niewiadoma en Elisa Longo Borghini oet dat grupke weg. Zij leke same te goon aonkoume, meh dorste in de slotkilometer neet es ierste aon te goon. Heidoor kóste de achtervolgsters ze achterhole. Marianne Vos waor vaan hun de sterkste; ouch de res vaan 't podium woort Nederlands.

Podium

1. Marianne Vos (NED)
2. Demi Vollering (NED)
3. Annemiek van Vleuten (NED)

Race vaan de manslui

Verluip

Bij de manslui vörmde ziech al gaw 'ne kopgróp vaan tien maan, dee laank op zoeget vief, later veer menute veuroet bleef. Op zoeget tachteg kilometer veur de finish begós dee veursprunk trök te loupe. In 't lèste deil vaan de race woort de gróp ingerekend; heibij veel ouch 't peloton oeterein. Drei maan kaome noe veurop te ligke, de Belsj Wout Van Aert, de Brit Tom Pidcock en de Pruus Maximilian Schachmann. D'n aofluip waor 'nen oongemein inge fotofinish tösse Van Aert en Pidcock- zoe ing tot de renners zelf neet wiste wee gewonne had. Ouch op 't oonbewèrk tillevisiebeeld waor dat neet te zien. 'ne Bewèrkde finishfoto sjreef oetindelek de wins aon Van Aert touw.

Podium

1. Wout Van Aert (BEL)
2. Thomas Pidcock (GBR)
3. Miximilian Schachmann (GER)