Alt (beer)

Van Wikipedia
Dit artikel is gesjreve in 't Venloos. Ómdat 't plaatsgebónge is, maogs doe 't ómzètte nao 't Düsseldörper Platt, es te dit dialek sjpriks.

Düsseldörper altbeer

Altbeer is 'n beer van baovegisting en is 't rizzeltaat van 'n brouwtraditie die euren oorspronk vind in de Nederrien. Dao wuurt 't dan ouk vuul gedrónke. Düsseldörp gelt min of mier es 't centrum van die brouwtraditie en vandaag d'n daag guuef 't dao nog verscheie brouwerieje die dit beer brouwe.

Alt is amber- wies koperkleurig en is einigszins verwant aan typisch Ingelse pale ales en Belse bere van hoeëge gisting wie Palm. 't Verschil mit pils (beer van óndergisting) en anger hel bere van baovegisting, wie Kölsch, is dudelik te preuve. Alt is qua smaak waat zeuter en kreftiger.

Vreuger ware wiedoet de meiste bere baovegistend. Pils kós me eigelik allein in de wintermaonde make, want heejveur waar 'n keultemperatuur van 5 °C nuuedig. Mit de inveuring van 't zoeëgeheite Reinheitsgebot in Zuud-Duitsland waar 't brouwe van baovegistend beer in de zomermaonde verbaoje. 't Gebroek van ander grane (bv. gaers), vröchte of specerieje woort ouk verbaoje. In deile van Noordrien-Wesfale, 't Bels en Nederland goof 't die beperkinge neet. Wie 't Reinheitsgebot vervolges woort versoepeld, kós altbeer 't ouk nao de landelike inveuring euverlaeve. Doordet baovegisting as de alde methode woort beschouwd, kreeg dit beer in de volksmónd de naam alt(beer).

Wiewaal altbeer gewuuenlik mit Düsseldörp wuurt geassocieerd, is Diebels in Issum de bekindste brouwerie mit wiedoet de groeëtste aafzetmert. Vaerder steit de aldste brouwerie in Korsjebrooch, aeve ten oeëste van Jlabbach. Heej brouwt me al saer 1266 altbeer en daomit is 't bedrief dinkelik d'n aldste, nog bestaonde brouwer van dit type beer.

Ouk in Nederland wuurt, door ónder ander Lindeboum, altbeer gebrouwe ónder de naam Venloosch Alt. De aldste vermelding van det beer in 't Venlose arsjief dateert van 't jaor 1785.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Alt_(beer)&oldid=451490"