Aansjlaag in Krasnogorsk van meëts 2024
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
.jpg)
Óp d'r 22e meëts 2024 vóng 'ne aansjlaag plaats in 'ne concertzaal i g'n Róssisje sjtad Krasnogorsk, 'n vuursjtad va Moskou. Durch geweervuur en branksjtichting zint volges de Róssisje autoritete zeker 144 luuj um 't leëve gekoame en 382 luuj verlets geraak.[1] D'r aansjlaag woeëd opgeëis durch d'r Afghanisje tak van IS,[2][3] wiewaal inkel Róssisje functionarisse suggereerde dat Oekraïne doa-achter zouw zitte.[4]
Achtergrónk[bewirk | brón bewèrke]
Islamitisj terrorisme is gee nui versjiensel i Róslank. 't Lank hat seër 't oeteevalle van de Sovjet-Unie in 1991 te make mit etnische en religieuze sjpanninge in d'r Kaukasus. Vuural i Tsjetsjenië kreeg 't fundamentalisme voot aan d'r grónk. Dit leide tot 'ne gewapende ópsjtand i g'n deelrippebliek en versjillende terroristisje aasjleëg doaboete, woe-ónger in e sjpitaal in Boedjonnovsk i 1995, in e theatergeboew i Moskou in 2002 en in 'n sjoeël i Beslan in 2004.
Óp d'r 7e meëts zouw d'r FSB 'ne potentiële aansjlaag óp 'n synagoog i Moskou han vuurkómme.[5] Kót doa-op waarsjuwde de ambassades van de VS en 't VK vuur 'ne meugelige nuie terroristisje aanval en woeëd ópgerope vuur groeëte bei-eenkómste te vermieje.[2] De waarsjuwing woeëd evvel es provocatie besjoewd en 'n poging vuur de Róssisje maatsjappie te desjtabilisere.[3]
Verloop[bewirk | brón bewèrke]
Óp d'r 22e meëts woar e concert geplaand i g'ne Crocus City Hall i Krasnogorsk. Rónk 22.00 oer drónge veer terroriste i camouflagekleier 't geboew binne, woe ze mit automatisje wapes 't vuur öäpende óp personeel en bezeukesj bei g'ne igank en doanoa óp bezeukesj in g'ne zaal. Ooch brook 'ne groeëte brank oet.[6] Sommige sjlachoffesj sjtorve aan de gevolge va versjtikking of rookvergiftiging.[7]
Noasjleep[bewirk | brón bewèrke]
In totaal woeëde 11 luuj gearresteerd durch de Róssisje veiligheedsdeens FSB, ónger weë 4 luuj die ópgepak woeëde vuur meugelige betrokkeheed.[6] De mieëtste verdachte kómme oet Tadzjikistan, e lank woe d'r Afganisje tak van IS ooch aktief is. 't Gieëf sjterke aawiezinge dat de verdachte gefolterd woeëde.[4]
Brónne[bewirk | brón bewèrke]
- ↑ Anadolu Agency - Death toll from concert hall attack in Russia’s Moscow region rises to 144
- ↑ 2,0 2,1 CNN - ISIS claims responsibility for attack at Moscow-area concert venue that left at least 60 dead
- ↑ 3,0 3,1 The Moscow Times - What Was Putin Doing During the Moscow Concert Hall Attack?
- ↑ 4,0 4,1 Neue Zürcher Zeitung - Terrorangriff in Moskau: Russland verbreitet Verschwörungstheorien über die Drahtzieher des Anschlags mit mehr als 140 Toten
- ↑ Reuters - Russia says it neutralized ISIS cell plotting attack on Moscow synagogue
- ↑ 6,0 6,1 Tagesschau - Zahl der Toten steigt auf 143
- ↑ BBC - What we know about attack on a Moscow concert hall