ADO Den Haag (voloet Alles door Oefening) is 'ne voetbalclub oet de Nederlandse stad D'n Haag, die in 't sezoen 2016/17 oetkump in de Ieredevisie. De club heet ouch e damesteam, wat zjus zoe good in de Ieredevisie späölt. Alle teams speule hun toeswèdstrije in 't greun en geel, de waopekleure vaan Den Haag. De club woort in 1905 opgeriech. In de beginjaore kós ze neet väöl klaormake, meh vaanaof de jaore twinteg klom de club op nao de landeleke top. 't Huugdepunt laog in d'n Twiede Wereldoorlog, wie ADO twie kier (1942 en 1943) landskampioen woort. In 't sezoen 1956/57 woort ADO d'n ierste kampioen vaan de Ierste Devisie. Nuie glorietied gaof 't ind jaore zèsteg en begin jaore zeveteg. In 1971 splitse de proftak ziech nao fusie mèt Holland Sport aof es FC Den Haag. ADO haolde in deen tied in de sjeem vaan Ajax en Feyenoord noets 't kampioensjap, meh kaom wel tot Europees voetbal. Bekinde speulers oet die jaore waore oonder mie Dick Advocaat, Martin Jol en cultspeuler Aad Mansveld. De jaore daonao waore wisselvalleg en FC Den Haag, wat in de jaore negeteg weer ADO góng heite, degradeerde dèks nao de Ierste Devisie. Vaanaof 2014 kaom ADO in han vaan 't Chinees sportbedrief United Vansen. Zien frequinte weigering um geld in de club te stoppe leide tot doorloupende geldnoed en conflicte mèt de organisatie.
ADO steit algemein bekind um zien oetgebreide supporterscultuur, meh ouch um wiedverbreid hooliganisme.
Opmerking: 't Sezoen 2019/20 woort in verband mèt de COVID-19-pandemie aofgebroke. ADO Den Haag, wat normaal zouw zien gedegradeerd, bleef daodoor in de Ieredevisie.
