Toon Hermans

Van Wikipedia
Gank nao: navigatie, zeuke
Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Zittesj, as te dit dialek sjpriks.

Silhouet van Toon Hermans

Toon Hermans (17 dieëtsember 191622 april 2000), voloet Antoine Gerard Theodore Hermans, waas 'ne bèkendje Zittertse cabaretier, dichter en zenger in 't Nederlands en 't Limburgs. Wiejer componeerdje, sjiljerdje, regiseerdje en sjreef d'r ouch. Hae waas d'n ieëste in Nederlandj dae inne vorm van 'n onemanshow optrooj.

Hae wuuertj gezeen es eine van de Groeate Drie van 't Nederlands cabaret. Hermans, Wim Sonneveld (1917 – 1974) en Wim Kan (1911 – 1983) waere namelik besjoewdj es de grótste drie cabaretiers van Nederlandj vanne nao-oorlogse generaasje.

Gesjiechte[bewirk | brontekst bewerken]

Toon Hermans waerdje gebaore es twieëdje van vief zeuns van de bankier Jean Baptiste Nicolas Hermans (1881 – 1928) en Maria Elisa Josephina Dullens (1890 – 1967). Zie woondjen in 'n hieërenhoes in Zittert. Nao d'n Ieëste Werreldoorlog ging 't slechter mit de bankiersfemielje. Aan 't inj vanne jaore twintjig krege ze te make mitte economische crisis, wodoor de bank feliet góng. Zien vader is jónk gestórve, in 1928. Vanaaf det moment haet 't gezin väöl in mótte levere. In daen lestigen tied begós Toon mit dichte. Neet lang daonao benaderdje d'r vastelaovesvereiniging De Mander en in 1932 sjreef d'r zien ieëste revue. Det waas zón succes gewore, det hae mit de opbrings in 't laevesóngerhaad van zien gezin kós veurzeen.

Nao dit succes zów Toon nag talloeaze revues sjrieve. Hae verwórf plaatselike naamsbekèndjheid inne ómgaeving van Zittert. Ouch haet d'r mitgedaon aan 'n talentejach in Haerle, wo d'r es winnieër oete bös koom.

In 1942 vertróch Toon nao Amsterdam. Dao haet d'r mit de cabaretgroep van Carl Tobi opgetraoje in 't Leidsepleintheater. In 1946 lieërdje d'r Rita (Rietje) Weytboer kinne, 'n sjoeanheidspecialiste. Det jaor nag zeen zie getrouwdj, op 5 dieëtsember. Vanaaf daen tied toet 1952 speeldje d'r bie Theater Plezeer van Floris Meslier. Mit dit gezelsjap waas d'r oppe radio te huuere. Toon leet zich veural inspirere door de clown Johan Buziau, mer ouch door Lou Bandy en Louis Davids.

In 1953 speeldje d'r zienen ieëste eige show. In 1955 begós d'r mit zien onemanshows, womit d'r 'ne Nederlandse primeur haw. Lanjelik brook d'r door mit ziene show van 1958, womit d'r veur 't ieës oppe televisie te zeen waas. In 1963 trooj d'r veur 't ieës op in 't Keuninklik Theater Carré.

Toon en Rietje höbben 'nen tied in Mestreech gewoondj. Later zeen ze trökgegange nao Amsterdam, de gebäörteplaats van Rietje. Ze höbbe drie zeuns gekrege: Michael, Maurice en Gaby. De middelste zoon waas in zien latere shows waal ins te zeen es figurant.

Toon haet väöl leedjes gesjreve veur zien vrouw. Wie Rietje kanker kreeg haet d'r versjillendje tournees aafgezag óm bie häör te kinne zeen. In 1990 is zie gestórve aan de gevolge daovan. Toon waas d'r kapot van meh ging door mit optraeje. Hae haet nag leefdjesleedjes veur häör gesjreve en gezónge, meh haw waal zichbaar meujte daomit.

Hermans is in 2000 gestórve aan 'n hertaanval in 't Antoniusziekenhoes van Nieuwegein. Hae is 83 jaor gewore.

Selectie[bewirk | brontekst bewerken]

Veurstèllinge[bewirk | brontekst bewerken]

Jaor Naam
1958 De stoel - De stoel waar zijn zuster op gezeten had
1958 De sprekert
1958 De voorzitter opent
1958 De tent
1965 High Society of Leg neer die bal
1967 De auditie: Duif is dood!
1973 De musicus of Strinzelthal
1974 Snieklaas
1980 De ornitholoog
1980 Het tennisracket
1980 De voorzitter van Ons Genoegen
1980 De auditie: Wat ruist er door het struikgewas


Leedjes[bewirk | brontekst bewerken]

Jaor Naam
1955 Kiek in 't glaeske (en sjlik medam)
1955 Oukook
Gaef mich dae lètste dans van dich
1958 Méditerranée
1965 Sien laat eens zien
1967 24 rozen
1968 Mien waar is mijn feestneus
Boum
D'n Auwe Zandjwaeg
Gaef mich dae lètste dans van dich
Mien deierbaar zuide
Vraog d'n heer èns
1996 In het graas van de wei
2000 Als de liefde niet bestond


Weiteswaerdigheid[bewirk | brontekst bewerken]

  • Toon Hermans is de bedinker van 't euverbekindje melodieke van 't Carnaval Festival in de Efteling, det gearrangeerdj is door Ruud Bos.

Externe link[bewirk | brontekst bewerken]

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Toon_Hermans&oldid=349836"