Meteorezwerm
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
'ne Meteorezwerm is te zien es de Eerd de baon vaan 'ne zwerm stöbdeilkes kruus. De stöbdeilkes zien miestal aofkomsteg vaan komete, die in hun baon um de Zon dees deilkes achter laote door verdamping es de komeet in de buurt kump vaan de Zon. Es de stöbdeilkes in aonraking koume mèt de atmosfeer vaan de Eerd zalle zie door de oploupende wrieving opwerme en oeteindelek verbranne ('ne meteoor). 't Resultaat is 'n opliechtende striep, dèks betiteld es vallende staar. Umtot 't mierdere komete gief in 'n baon um de Zon, gief 't ouch mierdere zwerme stöbdeilkes en umtot komete neet allemaol dezelfde baon doorloupe, zien de meteorezwerme ouch op versjèllende tije door 't jaor te zien.
Bij 'ne meteorezwerm liekene de meteore allemaol oet dezelfde riechting te koume. Me neump dit de radiant. De naom vaan de meteorezwerm is miestal gekoze aon de hand vaan de naom vaan 't starebeeld boe-in de radiant ligk.
[bewirk] Inkele bekinde meteorezwerme
| Naom | Tied vaan versjijning | Radiant in starebeeld | komeet |
|---|---|---|---|
| Quadrantide (of Boötide) | 2-5 jannewarie | Ossenhoeder (Boötes) | |
| Lyride | 20-24 aprèl | Lier (Lyra) | Thatcher |
| Eta-Aquaride | 1-8 mei | Watermaan (Aquarius) | |
| Delta-Aquaride | 24-31 juli | Watermaan (Aquarius) | |
| Perseïde | 1-15 augustus | Perseus | komeet Swift-Tuttle |
| Orionide | 21-22 oktober | Orion | komeet vaan Halley |
| Tauride | 3-13 november | Stier (Taurus) | |
| Leonide | 13-17 november | Liew (Leo) | komeet Tempel-Tuttle |
| Andromedide | 15 november-6 dec. | Andromeda | Biela |
| Geminide | 7-16 december | Twierlinge (Gemini) | planetoïde Phaethon |
| Urside | 21-24 december | Kleine Beer (Ursa Minor) | Tuttle |
| Iota Draconide | 26 juni-1 juli | Draak (Draco) | |
| Omicron-Draconide | 20-24 augustus | Draak (Draco) | |
| Zêta-Draconide | 21-31 augustus | Draak (Draco) |
