Guillaume Cornelis Beverloo

Van Wikipedia
Gank nao: navigatie, zeuke

Dit artikel is gesjreve in 't Gelaens. 't Weurt gewaardeerd óm in dit artikel 't Gelaens aan te hauwe of aan te gaeve welk anger dialek gebroek is.


Guillaume Cornelis van Beverloo alias Corneille

Guillaume Cornelis Beverloo, baeter bekènd es Corneille (Luuk, 3 juli 1922 - Villers-Adam?, 5 september 2010) waas 'ne Nederlandse kunsjilder.

Corneille is de verfransing van ziene tweëde veurnaam Cornelis en is ouch Frans veur 'kraoj' , ein van zien geleefde vogelthema's in zien werk.

Biografie[bewirk | brontekst bewerken]

Corneille woort gebaore in Luuk es kèndj van Nederlandse awwesj. Es 17-jaorige verhoesde hae nao Haarlem en in 1940 nao Amsterdam, wo hae, hoewaal hae groatedeils autodidact waas, van 1940 pès 1943 sjtudeerde aan de Kunstnijverheidssjoal en 'ne cursus teikene en etse volgde aan de Rieksacademie veur beeldende Kunste. In 1946 heel hae in Groninge zien eësjte expezisie.

Aanvankelik waas hae sjterk beïnvloed door 't werk van Picasso, mèr in 1948 maakde hae zich hiejvan los en trooj hae toe tot de Nederlandse Experimentele Groep, later de Cobra-bewaeging geneump; hae is daovan mede-oprichter, same mèt ónger angere Karel Appel, Anton Rooskens, Jan Nieuwenhuys en daene ziene broor Constant Nieuwenhuys.

In 1950 verhoesde hae van Amsterdam nao Paries. Daonao reisde hae meërmaole nao anger deile van de waereld: Noord-Afrika, Noord-Amerika, de Antille en Zuud-Amerika. Dees reize bepaole in hoag mate de aard van zien werk. Lyrische transposities in ein werm en genuanceerd coloriet drökke zien sjpontaan emoties oet. Vanaaf 1960 veel hae trök op figuratieve kuns, wobiej vrouwluuj, vögel, blome en dèks ouch personages tot zien artistiek vocabularium beheuëre.

Corneille bleek medio 2005 nog aeve wirklöstig es vreuger, ouch al woort gezag dat hae "depressief" zouw zeen. [1].

Zelf bewaert hae dat sjildere geine hobby of werk is, mèr eërder ein roping. De lèste jaore haaj Corneille zien atelier in Paries en woonde hae in ’t dörpke Villers-Adam. Bezeukesj woorte bekand neet toegelaote door de kunstenaer.

In 2006 is ein recordbedrag betaald van € 215.000 veur 'n sjilderie van Corneille.

Hae maakde de lètste jaore 'ne meujlike tied door; hae verbleef kènnelik in 'n inrichting en woort (volges ein door zien echgenote aevel taengegesjpraoke berich) ónger curatele gesjtèld door zien vrouw en ziene zoon, ómdat hae 't geldj verkwanzeld zouw höbbe, veroarzaak door 'n bipolaire sjtoarnis. Corneille zien vrunj en zien galeriehouwesj bewaere aevel dat zien gezin häöm haet laote opsjlute ómdat ze geldj wolle. In juni 2007 liek hae d'r weer baove-op te zeen; hae waas perseuënlik aanwezig biej de äöpening van 'n tentoansjtèlling in 't CoBrA-museum in Amstelveen.

In 2008 woort 'n kwestie ómtrent de auteursrechte op zien werk óngerwerp van ein civiel gesjil veur de rechbank in Amsterdam. Dao-in góng 't mèt name óm de vraog of Corneille leej aan ein geisteskrankheit op 't mement dat hae de rechte op zien werk euverdroog en of dees euverdrach daodoor vernetigbaar waas, en in hoewiet eventueel door zien wederpartiej ein beroop op 't vertroewesbeginsel meugelik is, doordat 'n achteraaf gesjtèld wilsgebrek dan neet waas opgemerk. In dit gesjil is op 10 september 2008 ein eësjte vonnis geweze.

In 2010 sjtorf hae op 88-jäörige laeftied in Frankriek. Op ziene wunsj weurt hae begrave in Auvers-sur-Oise (effe bove Paries), vlakbie de graver van Vincent en Theo van Gogh.

Werke[bewirk | brontekst bewerken]

Katvogel, in 2001 geplaatsj in Heerhugowaard naobiej 't sjtation. Ein identiek beeld sjteit ouch biej 't CoBra Museum in Amstelveen

Zien kunswerk Au sein de désert, il y a encore de la place pour les yeux (1949) haet biej 'n veiling in 2006 in Kopenhage € 281.000 opgebrach. Nog noats is veur ein van zien werke ein dergelik hoag bedraag betaald.

Corneille haet ouch laevesgroate sculpture gemaak. Zien werk 'Le Bateau de L'espoir' woort in 1993 verkoch veur HFL 70.000 en is taengewoordig 'n völvoud van dit bedraag waert.

Óngersjeijinge[bewirk | brontekst bewerken]

Externe links[bewirk | brontekst bewerken]

Commons
In de categorie Corneille van Wikimedia Commons zeen media gerelateerd aan dit óngerwerp te vènje

Referentie[bewirk | brontekst bewerken]

  1. Corneille is zwaar depressief , aldus een kort bericht in het Algemeen Dagblad op 10 juni 2005, pag.17. Hij zou blijkens dat bericht in Parijs daarvoor "behandeld worden" en "volgens geruchten" zou zijn vrouw hem "onder curatele" hebben laten stellen, maar zij sprak dit (volgens datzelfde bericht) tegen. Corneille's appartement in Amsterdam zou zijn "leeggehaald" en hij had "enkele rechtszaken lopen over het auteursrecht op zijn werk".

Brón[bewirk | brontekst bewerken]