Theo van Gogh (kunshandelaer)
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Theo van Gogh (Zundert, 1 mei 1857 — Utrech, 25 januari 1891) waor 'ne kunshandelaer, dae veural in Paries gewèrk haet. Hae waor 'ne jóngere broor van de kunssjilder Vincent van Gogh.
Vincent wèrkde al innige jaore bie 't Haags filiaal van de kunshandel Goupil & Cie, wie Theo in 1873 ging wèrke bie 't Brussels filiaal van dees firma. In juni woort Vincent euvergeplaats nao 't filiaal in Londen, en vanaaf november van dat jaor wèrkde Theo in 't filiaal in Den Haag. Oarsjpronkelik waor de kunshandel van hunne nónk Vincent van Gogh gewaes, dae op 'n gegeve moment partner ies gewore van de de kunshandel Goupil in Paries. Wie Theo ziech tot 'ne succesvolle kunshandelaer ontwiekkelde, woort hae euvergeplaats nao 't hoofkentoar van Goupil & Cie in Paries. Vanaaf de winter van 1880-1881 sjiekde hae ziene broor Vincent eder maond sjildermateriaal en geld.
Theo van Gogh sjtorf op 33-jaorige laeftied en woort aanvankelik begrave in Soestbergen bie Utrech. Op 8 april 1914 ies hae herbegrave in Auvers-sur-Oise in Frankriek, neve 't graaf van ziene broor Vincent.
De filmregisseur Theo van Gogh waor ziene achterkleinzoon.