Geert Wilders

Van Wikipedia
Gank nao: navigatie, zeuke

Dit artikel is gesjreve in 't Venloos. 't Weurt gewaardeerd óm in dit artikel 't Venloos aan te hauwe of aan te gaeve welk anger dialek gebroek is.


Geert Wilders

Geert Wilders (Venlo, 6 september 1963) is eine rechse Limburgse politicus. Sins augustus 2002 is hae lid van de Twieëde Kamer, ieërs veur de VVD, mer op 3 september 2004 braak hae mit zien partie en sinsdaen vörmde hae 'n einmansfractie, die 'r zelf de Groop Wilders neumde. Later richde hae de Partij voor de Vrijheid op, die bie de verkezinge op 22 november 2006 neuge zaetele haolde.

Carrièr

Wilders dae de Havo en volgde in Amsterdam aan de Aope Universiteit 'ne cursus, wo hae 'n paar deilcertificate haolde in de rechsgelieërdheid. In 1987 ging hae beej de VVD, en al in 1990 woort 'r dao beleidsmitwirker Sociale Zake en Sociaol-ikkenomisch Beleid. Ouk schrieëf hae toesprake veur de Twieëde-Kamerlede. In 2002 woort 'r veur 't ieërs op 'n verkeesbare plaats gezèt en óndanks det de VVD erg verloos kwaam hae toch in de Kamer. As VVD-lid próffeleerde hae zich veural mit conservatieve standpunte wie 'n strikte halding taege d'n islam en 'n ingriepende belastingverlaoging veur de hoeëge inkomes. Zien standpunte euver d'n islam wirkde hae oet mit Ayaan Hirsi Ali, dewiel hae mit Gerrit-Jan Oplaat 'n manifes opstèlde euver de koers die de VVD zól motte goon vaore. Dit alles leide dertoe det de vrieving mit zien partiegenaote toenaam. Oeteindelik mós hae dus in september 2004 oet de partie stappe.

Zien óngenuanceerde oetsprake euver veural d'n islam laeverde häöm in korten tied hiel väöl stumme op, entans in de peilinge; 't huugdepunt laog bie de twintig zaetels. Ouk kaam hae nog dèks in 't nuujs nao de maord op de cineas Theo van Gogh: hae woort väöl bedreig en mós maondelank op 'n geheime locatie verblieve. Later blaek det 'nen bunker in Amsterdam te zien gewaes. Loupende 't jaor 2005 naam zien populariteit ummer mieër aaf, doordet hae der neet in slaagde nog väöl in 't nuujs te kome en doordat 't politiek klimaat in Nederland linkser woort. In oktober stón 'r nog mer op eine zaetel in de peilinge.

In januari 2006 kaom hae in 't nuujts doordet hae de spotprintjes van de profeet Mohammed, die op dat momint tot groeëte bereuring leide in de moslimwaereld, op zien website te zètte met as doel de maekers dervan ein hert onder de riem te staeke.

Bie de Twieëde-Kamerverkezinge van 22 november 2006 won zien Partij voor de Vrijheid neet minder as neuge zaetele. Veer van de vief gemeintes wo-in de PvdV 't bèste presteerde laoge in Nederlands Limburg.

Ideologie

't Gedachtegood van Geert Wilders concetreert zich op d'n islam: radicale utinge daovan mótte zónder mie verboje waere en de regering mót dao wiedgaonde maotraegele veur numme: zoeë zoel 't meugelik mótte zien um luuj zónder concreten aanklach vas te zètte. Radicale praekers mótte 't land oetgezat waere en bie de minste verdinking mótte verdachte moskeeë gesloeëte waere. Later wilt hae de boew van nuuj moskeeë verbeje en de immigratie van moslims stop zètte.

Wiejer vint hae det de maximumsnelheid verhoeëg mót weure, det Turkieë noeët lid mag waere van de EU en det Nederland zien óntwikkelingshulp mót halvere.

Wilders publiceerde väöl van die ideeë op een vergaodering van de VVD aafdeiling Limburg. Ouk schrieëf hae 'n book, Kies voor vrijheid, worin hae väöl van die ideeë dudelik mak.

Zien ideologie wuurt dök es "ónvermingk rechs" bestumpeld. Hie-um wuurt hae bewónderd, mer critici zègke det 't allemaal väöls te populistisch en gewuunlik gaaroet neet haalbaar is.

Citate

  • "Ik bin veur 't neet wieër oetbreide van de EU. Turkieë drin, Nederland droet."
  • "D'n euro is e groeët probleem. 't Stabiliteitspak is e lecherke: Väöl groeëte Europese len wie Frankriek, Italië en Griekeland hebbe de criteria mit de veut getreje. Ik bin daorum veur 't neet wieër oetbreie van 't aantal len wat aan d'n euro mitduit; zoel dat wel gebäöre, dan mótte we d'n euro hereuverwege. Lever 'ne sterke gölle es 'ne zwaken euro."
  • "[Ik bin veur] 't 'three strikes you're out'-princiep: drie geweldsdelikte en de kries laeveslank.
  • "Alle tekste van de euverheid waere oetsletend in 't Nederlands gestèld."
  • "De VVD is 'n bejäördetehoes in 't kwedraat."

De ieërste veer citate kome oet Wilders zien "ónaafhenkelikheidsverklaoring".

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Geert_Wilders&oldid=349172"