Feyenoord
Van Wikipedia
Dit artikel is gesjreve in 't Oeals. 't Weurt gewaardeerd óm in dit artikel 't Oeals aan te hauwe of aan te gaeve welk anger dialek gebroek is.
Feyenoord is ein professioneel voetbalclub oet Rotterdam, opgerich op 19 juli 1908, die oetkumptj in'ne Eredivisie. De stadionclub sjtuitj d'rom bekindj ein club van 't volk te zeen. De thoesbasis is 't Sjtadion Feijenoord, det in'ne volksmondj De Kuip weurdj genumpdj. De traditioneel oetrösting van Feyenoord besjtuitj oet ein rood-wit shirt mit zjwarte boks en kouse. De voetbalploog is ein van'ne drie traditionele topclubs in Nederlandj.
Feyenoord won al 14 keer de Eredivisie, 11x de KNVB baeker, 2x de UEFA Cup en 1 keer de Europacup I, de voorluiper van'ne Champions League. Daomit sjpeeltj Feyenoord oet historisch ougpuntj ein vooraansjtaondje rol in'ne Nederlandse voetbalcompetitie.
Inhawd |
Gesjiedenis
Ontsjtaon
De Nederlandse club Feyenoord is ein voetbalclub mit ein lang historie. Op 19 juli 1908 waerdje in 't café "de Vereeniging" van eigenaar Jac. Keizer de voetbalclub 'Wilhelmina' opgerichtj. D'r waerdje gesjpeeldj in rooj shirts mit blauw moewe, en witte bokse. In 1909 waerdje de naam verangerdj in HFC (Hillesluise Footbal Club). HFC sjloot zich aan biej de Rotterdamse Voetbalbondj, maar omdet d'r al ein club waas die HFC (noe Keuninklikke HFC, in Haarlem) hédje, mos de naam weer verangerdj waere. De naam waerdje RVV Celeritas, d'r waerdje gesjpeeldj in horizontaal gael-zjwart gesjtreepdje shirts en witte bokse. In 1912 promoveerde Celeritas nao de NVB. Omdet d'r ouch al ein club waas die Celeritas hédje, mos de naam weer verangerdj waere en noe kreeg 't de naam Feijenoord (mit ein ij). Taegeliekertied kreeg 't de rood-witte shirts mit zjwarte boks en zjwarte kouse, zo es veer ze noe nog sjteeds kinne.
Eerste successe
Zesteen jaor nao de oprichting, drie jaor nao de promotie nao de hoogste klasse in 1921, vierdje Feijenoord zien eerste echte succes, 't Nederlands landskampioensjap. Later volgdje nog meer kampioensjappe, maar det eerste kampioensjap vonje väöl Feijenoorders toch 't sjoonste van allemäöl, veural omdet de rolle definitief ware omgedrejdj: de 'arbeiders' haje de 'here' versjlage. Häör club, häör Feyenoord, oet de boezem van 't volk, was de béste van Nederlandj. Toen waas 't succesverhaol van'ne jaore die volgdje begos. Net wie in 't kampioensjaor 1924, waerdje Feijenoord in'ne res van'ne jaor '20 nog inkele kere afdeilingskampioen, maar eine landjstitel volgdje allein nog in 1928. In 1930 waerdje veur 't eers de KNVB-beker gewonne. Vief jaor later lökdje 't Feijenoord om det kunsje te herhaole, deze keer in'ne finale taege HVV Helmondj. In'ne jaore '30 en '40 waerdje d'r 5 baekers en 7 landskampioensjappe gewonne. In 1965 behaoldje Feijenoord veur 't eers in zien historie de döbbel (landskampioen en baekerwinnaar).
Gouje periode
Feijenoord internationaliseerde de naam in de jaore zevetig nao Feyenoord, omdet de club toen regelmaotig Europacupwedstrijde sjpeelde en boetelenjers meujte haaje mit 't oetsjpraeke van'ne 'ij'. De club waerdje opgesjplitstj in SC Feijenoord, de amateurtak, en Feyenoord Rotterdam, de proftak. En won in 1970 es eerste Nederlandse club de Europacup I veur landskampioene.
Op 8 mei 2002 krege de redelik succesvol jaore '90 ein nog succesvoller vervolg. Feyenoord veroverdje onger leiding van trainer Bert van Marwijk en mit oetblinker Pierre van Hooijdonk in'ne eige Kuip, taege de Duitse kampioen Borussia Dortmund, nao 28 jaor veur de tweede keer in zien historie de UEFA Cup, get waat in Nederlandj weinige meer verwacht haaje. De Uefacup wins van 2002 waar 't begin van ein lang periode wo de Rotterdamers nieks wonne. Toetdet Bert van Marwijk in 2008 weer trainer waas en Feyenoord verasdje vrundj en vijand door weer ins in häör jubileumjaor de KNVB-baeker te winne.
Clubcultuur
Geen woorden maar daden is ein regelke oet t clubleed en sjtuitj symbool veur de cultuur van Feyenoord. 't Is ein club van (have)arbeiders; 'henj oet de moewe en werke veur dien geldj'.
Clublied
't Clubleed van Feyenoord is sins 1961 't Hand in Hand:
- Ga je mee naar het stadion
- Naar de club van rood en wit
- Zoek een plaatsje in de zon
- Waar je zo gezellig zit
- Kijk ze komen op het veld
- Een gejuich uit duizend kelen
- Ja, je staat er van versteld
- Als die sterrenploeg gaat spelen
- Dan is altijd wat je hoort...
- Het lied van Feyenoord
- Hand in hand kameraden
- Hand in hand voor Feyenoord 1
- Geen woorden maar daden
- Leve Feyenoord 1
De melodie van "Hand in Hand" waerdje in'ne negeteende eeuw gesjreve door de Duitser Wilhelm Speidel. Het 'Leed waerdje in'ne loup van'ne jaore door diverse Nederlandse clubs gebroektj; D'r zeen biejveurbeeldj versies van SVV en DHC bekindj. Jaap Valkhoff zoot in'ne jaore zestig zowaal ein Feyenoord- es ein Ajax-versie op'pe plaat. Onger Feyenoord-supporters greujde 't vervolges oet toet 't officieuze clubleed. In t zuide van Nederland'j gebroektj ouch MVV häör eige versie van 't "Hand in Hand". In Belsj heurs se de melodie regelmaotig van'ne tribunes komme es Club Brögke zien wedsjtriede sjpeeltj.
Mascotte
De offisjeel mascotte van Feyenoord is Coentje. Genumpdj nao de grote voetbalheldj oet Rotterdam, Coen Molijn. In mei 2007 waerdje aevel de gorilla Bokito populair onger de supporters van'ne Rotterdamse volksclub, naodet dae nationaal in 't nuuts kwaam wie hae ontsjnapdje oet zien verblief in Diergaarde Blijdorp, de deretuin van Rotterdam.
Aope daag
Idder jaor komme teendoezendje miense oet 't hele landj nao de traditionele aope daag in'ne Kuip om 't seizoen te aopene. Sjpectaculair hoogtepuntj is de helikopter dae in 't sjtadion landj om de nuuj aanwinste symbolisch nao de Kuip en 't Legioen te bringe. Bienao aeve sjpectaculair is de eerste training van Feyenoord op 't trainingsveldj naeve de Kuip, ouch dao zeen inkele doezendje fans op'pe bein om ein glimp op te vange van'ne nuuj gezichte.
