Biesjop

Van Wikipedia

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


Norbert Trelle, de biesjop van Hildesheim, mèt ièreteikes: mieter, sjtek en boorsjkruus

'ne Biesjop of bisjop (Nederlands: bisschop) ies in de hiërarchie van de Katholieke kèrk, de Orthodoxe Kerk de Anglicaanse Kerk of de Lutherse Kerk 'ne geistelike dae 'n biesjdóm besjuurt. De naam kump van 't Griekse episcopos, wat "opziechter" beteikent.

In de Katholieke kèrk, krieg hae 't amt toegeweze door 'n wiejing, die door drie anger biesjoppe weurt verliènd. De paus haet häöm van te veure beneump of haet de veurdrach bevestig. Op de kardinaal en de paus nao, ies de biesjop de belangriekste functie binne de Katholieke kèrk. Biesjoppe die kardinale zint (wie die van Utrech en Mechele-Brussel) ziete ouch in 't Kolleesj van Kardinale, 't hoagste besjtuursorgaan van 't Vatikaan.

Ièreteikes[bewirk | brón bewèrke]

De biesjop maog es ièreteikes 'ne mieter, 'ne biesjopssjtek , 'n boorsjkruus en 'ne biesjopsrink drage. De sjtek (sjtaaf) haet aan de bovekant 'ne krol. Meistal ies'r gemaak van edelmetaal of 'n verfiende houtsoort. 't Ies 't teike van mach en herderlike zörg. 't Boorsjkruus ies 'n teike van waerdigheid, meistal van goud gemaak. Ouch abte en abdisse drage diet teike.

Biesjdóm[bewirk | brón bewèrke]

't Gebeed, dat kèrkrechtelik besjtuurd weurt door 'ne biesjop hèt 'n biesjdóm. In Nederland zint dat 't biesjdóm Remunj, Breda, Groninge-Leeuwarde, Haarlem, Den Bosch, Rotterdam en 't aartsbiesjdóm Utrech. Belsj haet de biesjdómme Hasselt, Luuk, Antwerpe, Brugge, Doornik, Gent, Name en 't aartsbiesjdóm Mechele-Brussel.

In de plaats woa de biesjop woont sjteit zien biesjopskèrk, kathedraal geneump.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Biesjop&oldid=447692"