Zweefmemint

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


E peerd in de galop. Me zuut dujelek 't zweefmemint boebij 't bies vaan de groond kump.

E zweefmemint is 'n oonderdeil vaan diverse geng bij zoewel twie- es veervoters. 't Wèl zègke tot allebei daan wel alle veer de bein op e zeker memint vaan de groond zien. Dit is e kinmerk vaan väöl snel en minder snel menere vaan veuroetbeweging.

Bij twieveuters[bewirk | brón bewèrke]

Twieveuters wie de mins kinne euver 't algemein twie menere vaan gaank. In 't wandele of stappe kump mèt edere pas ummer eine voot vaan de groond. Bij 't loupe evels zien kort nao d'n aofzat allebei de veut vaan de groond, umtot me 't bein hoeger opluf um ziech mèt mie krach te kinne aofzètte.

Bij 't snelwandele, 'ne sport boebij de atlete de wandelpas mote aonhawwe meh de bein wel stijver hawwe, veurt e zweefmemint tot 'n waarsjouwing - en bij herhaoling tot diskwalificatie.

Bij veerveuters[bewirk | brón bewèrke]

Veerveuters kin me verdeile in dravers en tèlgengers. Dravers (beveurbeeld peerd) kinne euver 't algemein drei basisgeng: stap, draf en galop. In de stap luf d'n draver ummer mer eine poet of ei bein op: hei kump 't bies zelfs neet in de buurt vaan e zweefmemint. In de draf, 'nen diagonaole gaank, besteit e kort zweefmemint wat de ruiter koelek veult. De oetvinding vaan de fotografie mós traon te pas koume veur dit mèt zekerheid oet te make. In de galop kin me 't zweefmemint dujelek zien en veule. 't Bies beweug ziech daan springentere; op 't memint tot 't zienen achterpoet / zien achterbein aofzèt, is 't e memint vaan de groond tot 't tegegestèld veurbein de groond weer raak.

Tèlgengers (beveurbeeld kemele) kinne 'ne stap en diverse vörm vaan tèlgaank, boebij de lateraol beinepare um en um weure aofgezat. Ouch hei besteit e dujelek zweefmemint: 't bies 'sjogkelt' ziech vaan ziene linker- nao ziene rechterkant en trök en kiert ziech ummer zoegaw e beinepaar de groond weer raak.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Zweefmemint&oldid=455182"