Zwaordjekrachsveldj

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Zwaordjekrach.

E zwaordjekrachsveldj of gravitatieveldj is e netuurkóndig krachveldj det van invlood is oppe bewaeging van alles det zich in det veldj bevindj. Zowaal deilkes en veurwirpe die massa höbben es deilkes zónger rösmassa (wie leech) waeren in e zwaordjekrachsveldj versneldj, vertraog of van richting verangerdj. Op kosmische sjaol is 't zwaordjekrachsveldj verantjwuuerdelik veur 'n bepaoldje krómming van 't hieëlal, die de historische en toekumstige óntwikkeling van 't hieëlal bepaoltj.

Zwaordjekrachsveljer waere veroearzaak dore aanwezigheid van massa. De zwaordjekrachswèt van Isaac Newton oet 1687 besjrief wie groeat 't veldj van 'n bepaoldje massa is: 't hèngk aaf vanne wieväölheid aan massa ennen aafstandj toet die massa. Inne modern algemein relativiteitstheorie van Albert Einstein oet 1916 wuuertj 't zwaordjekrachsveldj meistes besjreven es 'n krómming vanne veerdimensionale ruumdjetied. In principe is 't aevel ouch meugelik 'n besjrieving inne vorm van e veldj te gaeve. De theorie besjrief wiejer wie 't zwaordjekrachsveldj aafmaetingen en tiedsdoere beïnvloodj.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Zwaordjekrachsveldj&oldid=373498"