Zikakoorts
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Zikakoorts is 'n infectiekrenkde veroerzaak door 't zikavirus e virus verspreid door diverse mögkesoorte in tropische klimaote. 't Virus is geneump nao 't Zikawoud in Oeganda, boe 't in 1947 veur 't iers geïsoleerd woort. 't Huurt bij de femilie vaan Flaviviridae en 't geslach Flavivirus en is es zoedaoneg verwant aon knókkelekoorts (dengue) en geel koorts. Neve mögkebete kin de krenkde ouch door seksueel contak en bloodtransfusies weure euvergedrage; op die meneer kin 't ouch boete de trope gedije. Volwassene oontwikkele miestens gein symptome; wienie dat wel gebeurt, rappelere de symptome aon mèl gevalle vaan knókkelekoorts: verhoeging, oetslaag, roej ouge, gevriechspien en koppien. Bij oongebore kinder kin 't evels ernstege gevolge höbbe: 't virus hindert de oontwikkeling vaan de herses zoetot de kinder mèt microcefalie weure gebore. Zörg dao-euver kaome nao veure bij 'n groete epidemie die in 2015 in Brazilië begós en ziech euver groete deile vaan de Amerika's verspreide. 'n Wijer zörg is e verband mèt 't Guillain-Barrésyndroom: dees zeldzaom, levesgevierleke zenuwkrenkde kump in len die door de epidemie woorte getroffe tot wel 5 of 10 kier zoeväöl veur wie aanders.[1]
Dit artikel is e sjtumpke. De kans Wikipedia helpe door 't aan te völle