Zakopane

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Zakopane.

Zakopane is 'n stad in 't uterste zuje van Pole mit 27.600 (2014) inwoeaners, gelaengen in 't woiwodsjap Klein-Pole. 't Is 't bekèndjste wintjersportcentrum van Polen en geleef es oetvalsaord veur wanjelieërs inne Tatra.

Lang waas Zakopane neet mieër es e klei bergdörpke. Zoea is bekèndj det 't in 1646 neet mieër es 43 inwoeaners haw. Pas in 't midde vanne neugetieëndjen ieëf begós Zakopane es stad in beteikenis toe te nummen en begós 't toeristen en kónstenieërs oet 't 100 km naordeliker gelaenge Krakau aan te trèkke. In 1889 talj de stad 3000 inwoeaners. Vanaaf daen tied waas 't stedje ouch mekkeliker bereikbaar door 'n treinverbinjing. Tösse 3 jannewarie 1795 en 11 november 1918 huuerdje Zakopane bie Oeasteriek. 't Waas dore Derdje Poolse Deiling bie Oeasteriek gekómmen en door 't ènj vannen Ieëste Werreldkrieg koom 't bie de nuuj gevörmdje staot Pole.

De stad ligk op 'n huuegdje van 800 maeter ane voot vanne berg Giewont. Allewiel trèk de stad väöl toeriste; 't guuef taalrieke hotels en pensions. Dore typerendje boewstiel vanne Podhale mit houtere hoezer en väöl houtsniewirk, haet 't stedje nag ummer e dörps karakter. Ouch Villa Atma, 't hoes wo de kómponis Karol Szymanowski wóndje van 1930 toet 1936, is zoea houtere hoes mit riek sniewirk. De villa herberg noe 'n aan Szymanowski gewiedj museum.

De plaatselike bevölking, die in Pole de Góraly (= "bergbeweuners") waere geneump, hech sterk aan trediesjes. Oppe straot is döks 'n kapela te huuere die de veure streek tredisjenele meziek speeltj.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Zakopane&oldid=370692"