Waope van Amb Mofert

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Dit artikel geit euver `t waope vanne veurmalige gemèndje Amb Mofert. `t Amb Mofert haet veur zoeaver bekindj noeats e waope gehadj.

Heraldische ómsjrieving

Gedwarsbalktj, van zès stökke, de middelste doorsniejing gekanteeld, zilver en lazoer, `t twieëde stök belaje mit 3 viefblaar van zilver, geknoep van goud. `t Sjildj gedèk mit `ne gouje kroean van drie blaar en twieë parels.

Verklaoring

`t Waope van Amb Mofert is `n combinatie van de waopes van de veurmalige gemèndjes Berg ane Roer, Mofert en Postert. `t Waope vanne veumalige gemèndje Postert waas de basis veur dit ontwerp, ómdet Postert in ieërste instantie de naamgaever vanne nuje gemèndje waas. De gekanteelde doorsniejing symboliseerd `t kestieël in `t waope van Mofert. De 3 viefblaar kómme oet `t waope van Berg. De kroean in `ne kroean waat gebroekelik is op gemèndjewaopes. Eder gemèndje haet `t rech óm deze kroean op zie waope te veure.

Gesjiedenis

Wie de gemèndjes Berg ane Roer, Mofert en Postert sameginge toet de gemèndje Postert (later de gemèndje Amb Mofert), mos d’r `n nuuj waope ontworpe waere veur dees fusiegemèndje.

`t Nuje waope waerde ontworpe, aangevraog en verkrege

De Stuurgroep Gemeentelijke Herindeling Posterholt (SGHP) haw op 6 september 1990 ane Hoge Raad van Adel gevraog óm `n ontwerp te make veur `n nuuj gemèndjewaope. De raod kwoom op 9 oktoeaber 1990 mit `n veurstèl, det geliek is aan `t oeteindelikke waope. `t Ontwerp waas `n combinatie van de waopes van de drie veurmalige gemèndjes, mit es basis `t waope van Postert, ómdet de nuje gemèndje ‘’Postert’’ ging heite. De SGHP nóm dit veurstèl euver en lag `t bie de burgemeister en wèthajers vanne nuje gemèndje Postert neer. Op 24 januari 1991 waerde `t ontwerp goodgekeurd dore gemèndjeraod. Vervolges vroog `t college `t waope aan bie Keuningin Beatrix. `t Waope waerde keuninklik goodgekeurd op 25 april 1991 bie keuninklik besloet 91.003793.

Kritiek vanne Limburgse Commissie voor Wapen- en Vlaggenkunde

In november 1981 waerde binne `t Limburgs Geschied- en Oudheidkundig Genootschap (LGOG) de Limburgse Commissie voor Wapen en Vlaggenkunde (LCWV) opgerich. Dees commissie haw es doel de heringedeilde gemèndjes in Zuid-Limburg van historisch en heraldisch verantjwaorde nuje waopes te verzeen. Mit de gemèndjelikke herindeilinge in Midde-Limburg in 1991 ging dees commissie wiejer mit häör wèrk. Zie hawwe geliek al felle kritiek op `t ontwerp vanne Hoge Raad van Adel. Dit waas ómdet de waopes van Postert en Berg neet historisch verantjwaord zoue zeen. `t Waope van Postert is aafgelèdj van `n deil oet `t waope van Vloearep, womit Postert vreuger de sjaepebank deilde. Det deil in `t waope van Vloearep waas op zien beurt weer aafgelèdj van `t femieljewaope vanne femielje Van Vloearep. Dees femielje haet echter noeats hieërlikke rechte ghadj in Vloearep. D’r zeen zelfs gein aanwiezinge det dees femielje oeats bezittinge in Vloearep haet ghadj. `t Waope van Berg is ouch al lange tied discutabel. `t Waope van Berg zou aafgelèdj zeen van `t femieljewaope vanne femielje Van Vrymersum. Ouch hie gèldj weer det dees femielje noeats hieërlikke recht in Berg haet ghadj. Zie hawwe alein `n boerderie bie Berg. Waal mot de kantjteikening gemaak waere det de drie viefblaar ouch es Gelderse mispelblome besjouwd kónne waere, waat weer waal historisch verantjwaord is. Alle dörper oete gemèndje Amb Mofert höbbe vreuger oeats bie Gelder gehuuerd. De LCWV maakte `n anger ontwerp: ‘’Gedeild, I in lazoer twieë van kruutse verzene gekanteelde tores van goud oppe toep van `ne berg of heuvel van `t zelfdje, II in zilver twieë gekruutste sleutels van lazoer. `t Sjildj gedèk mit `ne gouje kroean van drie blaar en twieë parels.’’ De twieë tores kwome oet `t waope van Mofert en symboliseerde `t Amb Mofert, wo de drie dörper vreuger bie gehuuerd höbbe. De gekruutste sleutels slaon op `t aje kloeaster Sint Petrusberg in Berg ane Roer. Alle drie de dörper höbbe vreuger bie dit kapittel gehuuerd. De LCWV deej de gemèndje `t veurstèl ane handj, mer `t book waas óngerhandj al ómgedrage. De gemèjde wool `t net verkrege waope neet inrule veur `n nuuj.

Fusie mit Roerdale

Vanaaf 1 januari 2007 is de gemèndje Amb Mofert gefuseerd mit Roerdale. Dees nuuj fusiegemènjde Roerdale gebroek `t waope van aje gemèndje Roerdale. `t Waope vanne aje gemèndje Amb Mofert weurd neet dore gemèndje Roerdale gebroek.