Tribunal

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


D'n Tribunal Limbörg in Mestreech is d'n tribunal vaan 't arrondissemint vaan Nederlands-Limbörg. Zie is ein vaan de èlf tribunalle vaan Nederland. Op 't Belsj wèrk me mèt väöl mie tribunalle. De belaangriekste zien de daartien tribunalle vaan ierste aonlègk; ouch Belsj-Limbörg heet d'r ein, in Hesselt, mèt 'n extra aofdeiling in Tóngere.

'nen Tribunal, 'nen tribunaol, 'n rechbaank of, gebrukelek in väöl aander Limbörgse variante, e gerech is 'n officieel orgaon vaan de juridische mach dee euver matterie oetmaak boe-in börgers ooneinegheid höbbe euver datginnege boe zie rech op höbbe.

In modern democratieë speult d'n tribunal, en zien judicieel mach, e wiechteg parkèt in de maotsjappij. Door de sjei vaan de machte is de judicieel mach (ofwel de rechterleke mach) oonaofhaankelek. De executieve mach (de oetveurende, vaan de regering) en de legislatieve mach (de wètgevende, vaan 't parlemint) kinne ziech dus neet bemeuie mèt de procedure vaan tribunalle. Börgers die vinde tot hun oonrech is aongedoon, kinne ziech tot d'n tribunal kiere mèt 't verzeuk hunne casus te behandele. Dit meint tot de casus aonhaangeg moot gemaak weure, aongezien de rechter zelf geine casus maag aonvaange. Daoneve kinne aonklagers naomes börgers of naomes de euverheid ziech tot d'n tribunal kiere um wètseuvertreiers te laote bestraove.

In d'n tribunal zien 't de rechters die de casus beoerdeile en d'r 'n beslissing euver nömme. Es me 't neet mèt die beslissing eins is, kin me in bepaolde situaties in hoeger beroep gaon. Dat wèl zègke, tot me de casus aon 'nen hoegeren tribunal veurlègk, die de beslissinge vaan de liegere rechter kin hervörme of bevestege.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Tribunal&oldid=454890"