The Kik

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


The Kik is 'ne Nederlandse retrorockband, dee meziek in de stijl vaan midde jaore zesteg maak (beatmeziek). Allewel tot ze zien begós in 't Ingels, is hunne meziek allewijl Nederlandstaoleg. De band besteit oet Dave von Raven (leadzaank, gitaar), Arjan Spies (achtergroondzaank en gitaar), Paul Zoontjes (achtergroondzaank en tósje), Marcel Groenewegen (basgitaar) en Ries Doms (drums).

De band woort begin 2011 gevörmp; de muzikante hadde toen al 'n carrièr in versjèllende bands achter de rögk. Von Raven en Groenewegen kóste ziech oet The Madd, Doms had al gespäöld in The Spades en Hooghwater, Spies had gestande in Mark & The Spies. Op 2 aprèl 2011 traoje ze veur 't iers opebaar op, in De Machinist in Rotterdam. Nog datzelfde jaor brachte ze twie Ingelstaolege singles oet, My eyes are still dry en 't keersleedsje A Christmas song for you. Ind 2011 stapde Spies oet de band; Zoontjes vervóng häöm wie in jannewarie 2012 de band op Noorderslag moch speule. Kort veur de opnaomes vaan 't debuutalbum in mei kaom Spies weer bij de band, dee sindsdeen oet vief lui besteit.

't Debuutalbum Springlevend versjeen op 25 mei 2012 bij Excelsior Recordings en TopNotch. Intösse waor de band euvergegaange op 't Nederlands, en 't album bevat neve eige composities ouch covers vaan jaorezestegleedsjes. Zoe is Simone, wat e klei zomerhitsje woort, 'ne bewèrking vaan The dancer (vaan The Allusions), en woort Pleasant Valley Sunday (vaan The Monkees) vertaold nao Zevenhuizer zondag. Mèt keersemes 2012 brachte ze 'n vertaoling vaan hun eige keersleedsje oet: Kerstliedje voor jou. Dit singleke is allein op vinyl te kriege. Neve hunne meziek zien ouch 't artwork en de videoclips hendeg retro: de lèste tuine dèks jaorezestegtaffereelkes.

In 't achste sezoen vaan De wereld draait door woort The Kik tot 'hoesband' en moch 't edere lèste vriedag vaan de maond in 't program koume speule. Ind 2013 tourde de band mèt ziene Veelste Grote Nederbiet Sjoo, boe-in ze leedsjes vaan versjèllende, dèks vergete, Nederlandse beatbandsjes brach.

Discografie[bewirk | brón bewèrke]

Albums[bewirk | brón bewèrke]

  • Springlevend (24 in d'n Album Top 100)
  • 2
  • Armand & The Kik (mèt Armand)

Singles[bewirk | brón bewèrke]

  • My eyes are still dry
  • A Christmas song for you
  • Simone
  • Springlevend
  • Kerstliedje voor jou

Extern links[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=The_Kik&oldid=409756"