St. Michaël Ool

Dit artikel is gesjreve (of begós) in 't Oeals. Laes hie wie v'r mit de versjillende saorte Limburgs ómgaon.

Sint Michaël Ool is de sjötterie van Ool/Herte.

Gesjiedenis

De exacte datum van'ne oprichting van sjötterie Sint Michaël Ool is neet meer nao te gaon. Veur zover noe bekindj haetj op 15 oktober 1903 de oprichting plaats gevonje. Det gebeurdje in 't vreuger café Clerckx aan'ne maassjtraot nr. 13 in Oeal. In 1889 waerdje in'ne gezet van toen, de Maas- en Roerbode, waal meljing gemaaktj van ein pas opgerichdje sjötterie, of det eine veurluiper van sjötterie Sint Michaël is gewaes is neet meer nao te gaon. In historische processjtökke bliektj verder det in 1650 in Oeal op eine vogel waerdje gesjaote. Daobiej gebeurdje ein ongelök, wobiej ein 10 jäörig maedje door eine sjötter in'ne kniesjief waerdje geraaktj. 17 Jaor later waerdje ein proces geveurdj euver de ontsjtange letselsjaaj, mer de sjtökke euver de oetsjpraok zeen neet meer te vinje. Vanwaege al dees ondudelikheje weurdj dus es oprichtingsdatum 15 oktober 1903 aangehaje.

't Eerste optraeje van sjötterie St. Michaël vindj volges de Maas- en Roerbode al 6 daag nao de oprichting plaats. De gezet meldj namelik det de sjötterie op 21 oktober 1903 metlöptj in ein feessjtoet in Herte. Toet 1960 is d'r mer weinig gearchiveerdj euver de aktiviteite van'ne sjötterie. Oet archieve van diverse sjötterieje en de O.L.S. federasie is toch ein beeldj van deze tied te sjetse.

Suksesse

In 't meer es honderdjaorig besjtaao haetj de sjötterie de neudige suksesse behaoldj. 't grootste sukses is waal 't winne van 't O.L.S. op 12 juli 1975 in Oirsbaek. Door dees wins haetj de sjötterie op 4 juli 1976 't O.L.S. moge organisere. Dit O.L.S. geitj de beuk in es 't heitste O.L.S. ooit mit ein temperatuur van 36° celcius. Ein anger sukses is d'r op 16 mei 1976 es de drumband landskampioen weurdj in'ne tweede divisie. Daonaeve haoltj de drumband op 15 juli 1978 eine eerste pries in'ne tweede divisie op 't Waereld Meziek Concours in Kerkraoj.

Verbonjeheid mit de kérk

Vanaaf de oprichting is de verbonjeheid mit de kérk dudelik merkbaar. De keus veur de naam en beeltenis van'ne Sjötspatroon, Sint Michaël, de hoogste aartsingel dae 't kwaod in'ne vorm van eine draak besjtriejdj, verwies hie dudelik nao. Tiedes de processie haetj de sjötterie offisjeel de taak om 't allerheiligste te besjerme. 't Jaorlike keuningssjete weurdj ouch begos mit ein Heilige mis, wobiej de overlejene van'ne vereniging waere herdach en sjteun gevraogdj weurtj veur 't kommendje sjöttersseizoen.

Extern links