Michael Jackson

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Plaetje:Michael Jackson Reagan.gif

Michael Jackson mèt de Amerikaanse president Ronald Reagan en zien vrouw Nancy, in 1984.

Michael Joseph Jackson (Gary, Indiana, 29 augustus 1958) is 'nen Amerikaanse popzenger, songwriter, danser en producent. Heer begós zien carrière in de jaore zesteg bij Motown en woort in de jaore tachteg eine vaan de meis geleefde popstare aller tije. Ziene plateverkoup is oongewoen succesvol en zienen excentrieke levesstiel is alum bekind. Heer weurt bijgenump de King of Pop en Wacko Jacko.

Ouch zie zuster Janet Jackson heet 'n succesrieke solocarrièr.

Biografie

Michael Jackson woort in 1958 gebore es vijfde zoon vaan Joseph Jackson en Katherine Jackson. De femilie zouw oeteindelik oet nege kinder goon bestoon. Zien ma waor Jehova's getuige, en de kinder woorte ouch zoe opgetrokke. Tot 1987 hoort Michael formeel tot dees gemeinsjap. Michael Jackson vertèlde later tot z'ne pa häöm en zien breurs en zusters zwoer mishandelde. Al vreug trooj heer op mèt zien breurs oonder de naom The Jackson Five, op las vaan ziene pa, en in 1968 weure de vijf door Diana Ross, coryfee vaan de zwarte muziek, oontdek. In 1971 geit 'r e paar jaor laank solo; later nump heer 'n filmrol aon. Naotot heer in 1979 zien carrièr nui opnump geit 't hel, zoewel artistiek es commercieel. Zien albums verkoupe beter es die vaan welken arties daan ouch, en heer weurt vaan hoeg tot lieg gepreze um zien gooj combinatie vaan commercie en kwaliteit. Evels raak heer door zienen extreme riekdom geïsoleerd en es heer in 1986 alle rechte vaan de Beatles opköp verleert heer de vrundsjap mèt Paul McCartney en Yoko Ono. In 1988 köp heer e groet stök groond wat heer es kinderparadies inriech en Neverland duip. Heer zelf meint tot heer in zien jäög 't kind-zien heet mote misse en dat noe in wèlt hole. Ouch oonderhèlt 'r vaanaof deen tied ummer vrundsjappe mèt kinder, en liet heer dèks (doed)kranke keender nao zie landgood kómme.

Intösse heet heer ziech mèt diverse plastische operaties vaan neger tot blaanke laote umbouwe, mèt desastreus gevolge: z'n huid weurt abnormaal wit en Michael moot veurtaan oet de zon blieve, en zien neus bliek nao e paar correcties laanksem eweg te rotte (heer geit wijer door 't leve mèt 'n prothees). In 1994 trojt heer mèt Lisa Marie Presley, dochter vaan Elvis, wat 18 maond doorde. Daonao waor heer vaan 1996 tot 1999 getrojd mèt Debbie Rowe.

In 1993 besjöldeg 'ne jong Jackson devaan häöm seksueel misbruuk te höbbe; 't proces weurt nao 'n sjikking aofgebroke. In 2004 koume mierdere kinder en hun awwers mèt besjöldeginge vaan aonranding; de rechszaak eindeg op 14 juni 2005 mèt unaniem vrijspraak door de jury. Jackson heet intösse 'n sjöld vaan mier es 200 miljoen dollar opgebouwd.

Muzikaal carrièr

In 1969 lökde 't Diana Ross de door häör oontdekde Jackson Five tot staarsjap te bringe: de veer oetgebrachde singles woorte al nommer-1-hits. In 1971 brach Michael 'n solosingle oet, Got to be There, die neet nao nommer ein sjoot, al deeg 'n later hit, Ben, dat wel. Heer späölde nog inkel rölkes in filleme en kierde noe en daan trök tot de Jacksons, wie de groop intösse waor goon heite. In 1979 lanceerde heer obbenuits zien solocarrièr, deeskier mèt oonmiddellik succes: 't album Off the Wall haolde oeteindelik negentien miljoen verkochte exemplare. Nog väöl succesrieker woort Thriller, mèt wereldwied al zesteg miljoen stök verkoch. Op dees plaat combineert heer succesvol de typisch zwarte beats (vaan oet zien Motown-periood) mèt gemekelik in 't gehuur ligkende en toch prikkelende melodieë; alle muziek weurt door häömzelf gesjreve. De singles vaan dit album, boe-oonder twie duette mèt Paul McCartney, score 'n oongeluifelik succes. De opvolger, Bad (album), verköp get minder good, intösse rijs Michaels staar nog ummer, ouch al door zien frequinte media-versjijninge. Nao 't ouch good verkoupend Dangerous bringk 'r tien jaor laank gei nui album mie oet, al kump 'r noe en daan nog wel mèt 'n single, wie You are not Alone in 1995. De critici zien euver zien nui wèrk väöl minder good te spreke en in de media weurt ziene naom mie mèt al affaires es mèt muziek in verbaand gebrach. In 2001 bringk 'r Invincible oet, commercieel e maotig succes, artistiek nog minder. Me verwach tot heer de koumenden tied mèt e nui album zal koume veur 't look vaan zien sjöld te diechte.

Discografie

• 1972: Got to be there (Motown)
• 1972: Ben (Motown)
• 1973: Music and Me (Motown)
• 1975: Forever, Michael (Motown)
• 1979: Off the Wall (Epic Records)
• 1981: One day in your life (Motown)
• 1982: Thriller (Epic Records)
• 1984: Farewell my summer love (Motown)
• 1987: Bad (Epic Records)
• 1991: Dangerous (Epic Records)
• 2001: Invincible (Epic Records)

compilaties

• 1976: Best of Michael Jackson
• 1995: HIStory
• 1997: Blood on the Dance Floor
• 2003: Number Ones
• 2004: Michael Jackson: The Ultimate Collection
• 2005: The Essential Michael Jackson

Extern linke

• Officieel site oonder de vleugele vaan Sony Music
• IsItScary.com, veurnaom fansite