The Beatles

Van Wikipedia
(Doorverweze van Beatles)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


The Beatles.

The Beatles zien de meis succesvolle en belangriekste popgroop oet de historie vaan de popmuziek. Wereldwied höbbe ze in de jaore '00 naoventrint 1,1 miljard plaote verkoch.

De Beatles woorte bekind en populair mèt orizjineel, meh neet pretentieus popleedsjes en raakde geassocieerd mèt hysterische tienermeidskes. Later behoorte ze tot de pioniere vaan de kunszinnege popmuziek (strouminge die later psychedelica en progrock geneump zouwe weure).

De klassieke bezetting vaan de Beatles bestoont oet John Lennon (gitaar, zaank), Paul McCartney (bas, zaank), George Harrison (gitaar) en Ringo Starr (drums). Lennon en McCartney waore de kèrn vaan de groop.

Loupbaon[bewirk | brón bewèrke]

Lennon en McCartney lierde ziech in 1957 kinne en begóste 'ne band, dee nao väöl naoms- en personeelsveranderinge in 1960 definitief The Beatles geneump woort. In Liverpool, boe de jonge vaan kaome, waor 'n bleujende scene vaan rockbandsjes, die häören typische sound Merseybeat geneump woort. De Beatles begóste, wie alle bands, mèt covers vaan Amerikaanse muziek, en oondersjeide ziech deur väöl mie te covere es andere bands; zoe zonge ze ouch werk vaan girl groups.

In 1963 kaom häör ierste album oet, boevaan de singles oongeweun good verkochte. In 1964 kaome ze nao de Vereinegde Staote; de kums vaan de Beatles en de oongeluifeleke indrök die häör muziek maakde bij de jongere (Amerikaanse muziek verkoch veur e tiedsje aamper nog), wie ouch de opkums in d'nzelfden tied vaan de Rolling Stones, maakde tot me dao vaan British Invasion gong spreke.

De enorm populariteit maakde ze in korten tied puissant riek, meh 't concerte geve beveel ze neet lenger. In 1966 gaove ze häör laotste concert. In 't vervolg brachte ze inkel nog elpees oet. Dit had ouch demèt te make, tot ze elektronische muziekinstrumente en sampling-technieke gonge gebruuke, die op 't podium live neet oetgeveurd kóste weure.

In 1967 sjokeerde ze de wereld mèt häör album Sgt. Pepper's Lonely Hearts Club Band, dat algemein weurt gezeen es e kierpunt in pophistorie: vaanaof daan waore elpees belaangrieker es singles en woorte albums echte kunswerke, gein samebringsele vaan losse leedsjes. Ouch woort de plaat bekind es de "psychedelische elpee", umtot de Beatles zjus door dees plaat geïnspireerd waore door trips mèt d'n drög LSD.

In 1970 gonge ze definitief oeterein. De lede gonge solo muziek maoke, en John Lennon, dee in 1980 doedgesjote woort, kraog ouch bekindheid es polletiek activis. In de jaore negeteg perbeerde Paul McCartney mèt 't Anthology-projek de Beatles nui leve in te blaoze.

Discografie[bewirk | brón bewèrke]

Externe links[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=The_Beatles&oldid=456083"