Sjtèèbösjkapel

Van Wikipedia

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.


De Sjteebusjkapel bie Sjoppem

De Sjtèèbösjkapel liekt langs 'ne vaeldwaeg in Sjoppem, 'n gehuch va Voere. De kapel is geboewd va reste va 'ne Romeinse villa, dae dao in 1850 dör d'r toenmalige burgemeester en historicus Del Vaux is opgegrave en oetveurig in 't Fraans is besjraeve. Dizze villa zów, naeve dae van Haccourt, d'r groeëtste in de weij ömgaeving zieë gewes.[1] Naeve boewmateriaal is och o.m. 'n munt oet d'r tied va Nero gevoonde en glaze vörwerpe.

't Boewmateriaal[bewirk | brón bewèrke]

't Oondersjte deel van de kapel is gemakt va breuksjtèè in veerkaente bluk gekapt. Dit is gee Romeins materiaal. De laog dao-op is van Romeinse baksjtèè of tegulae. Gaanse broksjtukke Romeinse moeër mit d'r Romeinse specie nog d'r tussje, zeunt aaneengemetseld. Dae specie is te herkenne an de kling sjtukskes baksjteen (van kapotgevalle panne of tegels) d'r tussje. Dao-op trift me dan 'n laog, in veerkaente blukskes gehowwe zaandsjtèè aan. Typisch vör Romeinse boewwerke, och in Rome. De volgende laog besjteet oet in veerkaente blukskes gehowwe tufsjtèè. Dizze sjteen is hie neet in de buurt te vinge en waoërt och gaer gebruukt dör de Romeine in Rome. Dizze tufsjtèè is warsjienlek aafkomstig oet de Eifel. De daakpanne besjteunt noe oet modern panne mae nog 'n 10 jaor truuk loge authentieke Romeinse daakpanne op dis kapel. Wie, mit 't opkaome van de toeriste, de ing nao de aander pan verdween, hat me besjlaoëte ze te vervange en urgens veilig te beware. De kapel wert nog gebruukt väör 'n jaorlekse aoëpeloch-mis en bie de broonk.

D'r naam[bewirk | brón bewèrke]

D'r Romeinse villa zow roond 't jaor 300 n. Chr. verwoest zieë. Roond 1600 wert d'r busj, dae op die plaatsj dör de jaore heen waor oontsjtaande, oontgonne en de luuj veende bie 't oontginne en ploge boewmateriaal dat ze neet kinne. D'r toponiem Sjtèèbösj liegkt vör de haand mae dae verklaord neet wie die broksjtukke moeër dao kaome. Dat dao 'ne Romeinse villa how gesjtaande wisse de luuj roond 1600 neet. Voere is neet permanaent bewond gewes vanaaf de Romeine, zjuus wie de res van d'r sjtrieëk neet. Zoe zal 't volksverhaol De verzoonke sjtad van Ribbi oontsjtande zieë, dat zich zjuus hie aafgesjpeuld zow hubbe. In die sjtad laefde luuj die neet doogde en d'r èèges vör gezurgd haant dat ze vergonge. Mit Kaeërsjmis zow me de klokke van de kirk van Ribbi nog kinne hure loewe. 't Thema van verzoonkde plaatsje is universeel en vindt me waeltwied truuk in volksverhaole.

De Kruushieëre[bewirk | brón bewèrke]

De kapel wert, es wie alle waegkruutser en kapelle in Voere, oonderhaowe dör 'n vereniging die zich de Kruushieëre va Voere neumt.

Referentie[bewirk | brón bewèrke]

  1. Dagblad de Limburger, 7 dec. 2010 De mythe van de decadente Limburgse Romein dör Patrick Marx n.a.v. oonderzeuk van Karen Jeneson

Brónne en literatuur[bewirk | brón bewèrke]

  • Del Vaux, H. 1851. La Découverte du Steenbosch et l'origine de sa chapelle à Fouron-le-Comte. Liège, Desoer
  • Dreesen, Roland + Dusar, M. + Doperé, F., 2001 . Atlas Natuursteen in Limburgse monumentenx- 2e druk in: = 320p. . LIKONA ISBN 9074605184, p. 82, 224
  • Sweron, Guido + Aussems, Jean- Marie 2004 . De Sint- Lambertuskerk van ’s- Gravenvoeren in haar rijke, historische kader. Leuven, Davidsfonds, p. 7: luchtfoto
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Sjtèèbösjkapel&oldid=437825"