Rottumerplaat

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

Keek op Rottumerplaat.

Rottumerplaat is e Nederlandjs waddeneilandj waat vèltj óngere gemèndje Het Hogeland (Greuninge).

Te naorde grens 't eilandj ane Naordzieë en te zuje ane Waddezieë. Te wèste ligk Sjiermonnikoug, wovan 't wuuert gesjèdj dore Lauwers, en t'n oeaste Rottumeroug, wovan 't wuuert gesjèdj door 't Schild. Op Rottumerplaat ligk 't näördelikste puntj van Nederlandj.

De plaat is óntstange vanaaf 1833 en begós es 'n zandjplaat. In 1950 haet Riekswaterstaot 'n stoefdiek dao aangelag, went me wól toe nag Rottumerplaat gaon broeken es e wirkeilandj veure Waddezieë in te poldere.

Juus wie Rottumeroug versjuuf Rottumerplaat zich lansaamaan nao 't oeaste: ane wèskantj kalf 't aaf en anen oeaskantj slib 't aan. De zujeliker gelaenge zandjplaat Boschplaat greudje in 1959 vas aan Rottumerplaat.

Van 1965 toet 1985 greudje 't eilandj stendig nao zoea 900 hektaar, worop 't veur tieën jaor lang trögk klènder woort. Sieëre midde vanne jaore neugetig greudj 't eilandj weer get; det kump doordet ane naordwèskantj dune zeen óntstangen en 't aanslibben anen oeaskantj nag ummer doorgeit.

Rottumerplaat is ónbewóndj; toegank toet 't eilandj is zelfs verbaoje veure netuuróntwikkeling. Toet 1991 verzoch me de kuslien te handjhave, mer allewiel kump m'n allein nammeh twieë kieër de jaor dao veur zwerfaafval eweg te haole. Boetedet haet m'n e deil stake gepaotj zodet 't nuuj landj zich baeter hèltj en neet drek ewegspeultj.