Naar inhoud springen

Roeëtem

Van Wikipedia
Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Roeëtems, es te dit dialek sjpriks.

Ligking vaan Roeëtem in de gemeinte Dilse-Stokkem.
HH. Monulphus- en Gondulphuskèrk in Roeëtem.
Kepel vaan de Weerstand bij Roeëtem.

Roeëtem (Nederlands Rotem) is e dörp in Belsj Limburg en 'n deilgemeinte vaan Dilse-Stokkem. 't Ligk tössen Ieële en Dilse. Roeëtem had in 2006 3.689 inwoeners; de oppervlaakde vaan de deilgemeinte is 14,52 km². De bebouwing besteit, neve d'n dörpskern, nog oet 't Revelt en D'n Haagbaon.

Aonzien[bewirk | brón bewèrke]

Roeëtem ligk zoeget 'ne kilometer westelek vaan de Maos. Tösse 't dörp en de revier ligke twie groete grindloker, de Maerheuvel en de Bichterwaerd. Sinds de jaore negenteg weurt hei gei grind mie gewonne en is me die peul es natuurgebeed goon inrichte. In 't weste vaan de deilgemeinte klimp de groond nao e hoeger plateau; hei beginne de Kempe.

Monuminte en in um 't dörp zien 't kestiel Ommerstein oet d'n achtienden iew, de neoclassicistische dörpskèrk ('n Waterstaotskèrk oet de jaore 1830) en get kepelkes, boe-oonder de Weerstandskepel, 'n bedink aon 'n verzaotsgróp die hein in 1944 actief waor (zuug oonder).

Historie[bewirk | brón bewèrke]

In de Romeinsen tied woort d'n heerweeg vaan Tóngere nao Nimwege hei gelag. 't Tracé besteit plaotselek nog ummer es de Hoeëgbaon en löp parallel aon de nuie groete weeg. Roeëtem liekent pas in de vreug middeliewe te zien gestiech. Me nump aon tot 't roond 800 deil oetmaakde vaan 't domein Kaesing-Eik. De ierste vermelding dateert vaan 1202; Roeëtem vèlt daan oonder 't graofsjap Loen.

Aon 't begin vaan d'n Tachtegjaoregen Oorlog, in 1568, weurt Roeëtem geplunderd door de legers vaan Wöllem vaan Oranje. In 1660 weurt 't daobij hel geraak door d'n euverstruimende Maos.

In 1839, es de grens tösse Belsj en Nederlands Limbörg bij de Maos weurt gelag, kump de Bichterwaerd aon Roeëtem. In de negentienden iew zörge ouch d'n aonlag vaan 't spoor en de Zuid-Willemsvaort veur economische bleuj. In 1911 weurt e zinkfebrik opegedoon, die tot 1966 in bedrief zal blieve.

In 1970 geit Roeëtem, same mèt Ieële, Lanker en Stokkem, op in de gemeinte Dilse, die in 1987 weurt umgeduip tot Dilse-Stokkem.

Bron[bewirk | brón bewèrke]

Dit artikel is gebaseerd op, meh neet vertaold oet, 't corresponderend Nederlandstaoleg artikel, en wel in dees versie.

 
Gemeinte Dilse-Stokkem
Vaan van Dilse-Stokkem
Deilgemeintes, dörper en gehuchte: Dilse · Lanker · Ieële · Roeëtem · Stokkem
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Roeëtem&oldid=451381"