Rob Belemans
Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
Rob Belemans is 'n Vlamsje taalkundige dae óp 29 mei 2009 an de universiteet van Leuve promoveerde óp de dissertatie Taal of tongval? De gespleten Limburgse kus, oraal erfgoed en taalpolitiek.
- Belemans is same mèt de Taalunie van miening dat es 't Limburgs óp 't Belsj erkaant wert wie in Nederlands Limburg - binne 't Europees handvest ter erkenning van regionaal tale dus - dat daomèt da 't aantal modertaalsjpraeëkers van 't Nederlands óp 't Belsj vermindert, zoedat dit zów kinne leide töt 'n Nederlandstalige minderheid óp 't Belsj. Get wat politiek neet aanvaardbaar is vör Vlaandere. Belemans hèlt in dis redenering evvel gèng raeëkening mèt 't feit dat es Belsj dat Handvest oondertekent en Wallonië, Vlaandere en de Duutsjtalige Gemeensjap 't ratificere dat 't da ooch väöl minder Fraanstalige en bekaans gaar gèng (sic!) Duutsjtalige mie zów gaeve. De Europese Commissie besjoewt daobie de landstaal es de modertaal van de inwoners. [1]
- Belemans ievert vör de erkenning van 't Limburgs oonder artikel 18 van de UNESCO-Conventie vör immaterieel cultureel erfgood en wie e dat vör zich ziet, zèt e oeteen in z'n dissertatie. Vermits de UNESCO Belsj es laand erkènt en neet Vlaandere wert de kwestie taalpolitiek daomèt dus neet ömzeilt. 't Haat ooch gebiede in Wallonië en de Duutsjtalige Gemeensjap oeë die taal gekald wert.
- Belemans ziet evvel gee broeëd d'r in öm d'r vör te ievere dat Vlaandere 't väörbeeld van Wallonië vólgt, oeë al in 1990 al de dialecte, naeve 't Welsj ooch 't Plat van 't Moontzener- en 't Eupener gebied, erkaant zeunt es Binnelandse Regionaal Tale. Dis proceduur is väöl minder ömsjlachtig en gèft de dialecte óp 't Belsj e geliek sjtatuut oeëmèt de evenwichte gegarandeerd zeunt.
Belemans is o.m. docaent van d'r Lieërgank Limburgs, deeg oonderzeuk i.o.v. de Nederlandse Provincie Limburg nao 't taalgebroek in dis provincie, sjraef versjèjje dictionaire, makde Ich kal ooch Plat (vör Middelbaar oonderwies) in ópdrach van de Belsje Provincie Limburg en is d'r väörzitter van 'n Belzje aafdeling van Veldeke.