Regio
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
'ne Regio, 'n streek, e gewes of (mie algemein) e gebeed, is 'n aoneingeslote geografisch gebeed mèt e bepaold karakter. Dat karakter kin taolkundeg, cultureel, demografisch, institutioneel of geografisch vaan karakter zien.
Heer weurt meistes erkind door 'n officieel instantie, mer dat hoof neet per se. Zoe is de Balkan 'ne bekinde regio in Europa mer gief 't gein instantie die dee regio reprizzenteert.
Regio's kinne dus vaan groette hendeg väöl versjèlle. Zoe kinne, vaan klein nao groet, Zuid-Limbörg, de Limbörge, Zuid-Nederland, de Benelux en de Lieg Len, Wes-Europa of zelfs Eurazië regio's geneump weure.
Ing polletieke definitie
[bewirk | brón bewèrke]In aander contexte zien regio's zjus hendeg specifiek. In versjèllende len, wie Fraankriek en Italië, zien de regio's 'n zier specifieke laog mèt bepaolde polletieke verantweurdelekheie. Zoe is Ile-de-France, de regio boe Paries in ligk, eine vaan de Regio's in Fraankriek. Dees hantering vaan 't woord regio pas mie bij de origineel beteikenis vaan 't woord. Regio kump naomelek vaan 't Latien en specifiek vaan 't woord regere: allewel de oetspraok aanders is, heet dit woord perceis dezelfde beteikenis es 't Limbörgs woord regere.
In Belsj weurt de boveste, en belaangriekste, geografische laog binne 't fidderaol systeem gewesten geneump op 't Nederlands en régions op 't Frans. 't Geit hei um drei. In Nederland en in Duitsland heet de regio gein specifieke polletieke beteikenis.