Pygmalion (beeldhouwer)

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

Pygmalion waor in de Griekse mythologie 'ne preens oet Cyprus mèt 'n passie vör de beeldhouwkeuns.

Mythe

Pygmalion how zie gaans laeve niks aandersj es de zung va vroluuj kènne zieë en daovör woolt-e ooch neet trówwe. E bleef lever vriegezel, ömringt dör zien ège keuns. Daag en nach wèrkde-e an 'n ivore beeld va Galatea. E goof 't beeld de perfecte sjönhèèd en oeteindelek verleefde-e zich. E sjoonk 't beeld allerlèj cadeaus, zoewie juwele, en haoëpde dat 't beeld töt laeve zów kaome, mae 't bleef van ivoor.

Óp 'ne daag waoërt 't feest er ieëre van Aphrodite geveerd. Aoëveraal waoërt wierook gebraand en waoërte rundere geófferd. Pygmalion bleef nog e tiedsje bie 't altaar sjtoeë nao de óffers en e sjprook 'ne sjtille weunsj oet: "Goden, es d'r alles gaeëve kènt, gef mich dan 'n vrów." E how d'r mood neet öm "die van ivoor" te zègke en in de plaatsj zag-e "die liekt op mieng ivore vrów". Aphrodite, zelf aanwezig, begraeëp z'ne weunsj: driejmaol sjaoët 'n vlam hoeëg óp, es teke van genade.

Wie e hèem kieëm sjpoojde-e zich nao zie geleefd beeld en puuënde häör op d'r moond. Es wie dör e woonder waoërt 't ivoor wèèk, de kow sjmoolt voet. Daonao daankde Pygmalion Aphrodite doezendmaol. Nao hön trów vulde d'r mond naoëgemaol häöre sikkel töt 'n sjief en doe waoërt Paphos gebaore.

Óp 'ne aandere daag huurde Pygmalion van de verbórge sjatte van Acerbas en leet dem vermoorde, in d'r haoëp dat e dör zie zeuster 't bezit d'r van zów kriege.

Idee en waerk

De mythe van Pygmalion leidde in de middelieëwe töt de gedachte dat perfecte vrówwelekhèèd allèng kan besjtoeë dör manneleke sjeppingskrach.

Pygmalion is ooch d'r titel van e óp dit idee gebaseerd toneelsjtuk van George Bernard Shaw.
D'r musical My Fair Lady
D'r film Educating Rita
In De nacht van de pauw, 'n toneelsjtuk van W.J. Otten, vertolkt 'n vrówwebeeld ooch dit idee.
'ne Twist óp 't laeëvendig waeëre van 'n beeldhouwwerk vindt me truuk in Pinokkio.