Pungel

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.

---

'ne Pungel is ’n, in 'ne handjdook gebónje, mienwirkersjplunje.

Es de mienwirker de eësjte daag van de waek nao zien werk góng naom hae zien wirkkleijing van thoes mit, die door zien vrouw of zien móder waas gewesje. Dees kleijing woort dan in 'ne gries-blawwe handjdook gewikkeldj, de handjdook woort mèt zien hookpuntje biejeingebónje wodoor de pungel óntsjtónd. De mienwirker droog dae pungel meistal op ziene rögk nao zien werk (of nao hoes es zien wirkkleijing weer thoes gewesje moosj waere). In de pungel zaote ouch zien bótterhamme, meistal in ein gezèt gewikkeldj, ’n aluminium flesj gevöldj mèt koffie of thee en 'n oeër, ein zakhorloge in 'ne besjermende kas.

Dees pungele woorte op de koel aangekómme, in ’t badlokaal aan 'ne haok opgetakeldj zoadat ze dreuëg bleve.

Etymologie

’t Woord pungel is aafgeleid van ’t woord Püngel oet ’t Kölsj.

Anger beteikenisse

• De pungele sjteit in ’t Limburgs veur verfómfaajde kleijing, óntsjtaon doordat die in 'ne bunjel of 'ne pungel waas biejein gepak.
• ’t Wirkwoord pungele beteikent "'t zjwaor en meujzaam drage".
• ’t Wirkwoord pungele sjteit ouch veur ’t ónger ’t drage knuffele van 'ne baby of ’n klein kèndj. Vreuger woort 'ne pas gebaore baby es ritueel door de wiesvrouw aan de bezeukesj aan ’t kraombèd euvergereik mèt de wäörd: pungel 'm mèr aens wonao ze van de luuj verwachde dat ze häör wat geldj toesjtaoke.
• Later kroog ’t woord pungel ouch ein beteikenis van 'ne niksnut, "'ne dómmerik of 'ne lamlendeling".