Prostitusie in Mestreech in de 14e en 15e ieuw

Van Wikipedia
Naar navigatie springen Naar zoeken springen
Dit artikel is gesjreve in 't Klummesj. Ómdat 't plaatsgebónge is, maogs doe 't ómzètte nao 't Mestreechs, as te dit dialek sjpriks.

Beteikenis van sjtove
In d'n Mestreechse raodsverdrage en d'n literatuur euver bordele wurt regelmaotig melding gemak van sjtoven es bordele. 'n Sjtove mot dudelik ongersjeije wuëre van 'n bordeel. 'n Stove waor in d'ieësjte plaatsj 'n badhoes wo luu zich koste wesje en bade. In de twiëde plaatsj waore sjtove bordele. Dat dis twieë beteikenisse durch elkaar kenne loupe waor och in de middeliewe vanzelfsjpraekend. In d'n vèrtieënde iew betekende sjtove alling nog mèr bordeel, dus dao ken v'r och hie vanoet gaon.

Sjtove aan de Sjtoksjtraot
Prostitusie in de late middeliewe in Mestreech waor toegesjtaon in d'erkende sjtove en neet daoboete. 't Beleid van de gemeinteraod waor d'rop gerich d'n clandestiene prostitusie truuk te dringe zoëdat alle prostituees zich vestigde in de sjtove. Jus wie huj, lökde dat truuk dringe neet vanzelf.
De twieë erkende sjtove van Mestreech loge aan de Sjtoksjtraot die vlak langs de sjtadsmoer leep, thans 'n chique winkelsjtraot. In dees buurt waore mierdere 'oneerbaar' beroepe gelaege, zoeals de hudige sjtraotname nog aangaeve: Verwerssjtraot em Looierssjtraot. De prostituees van Sjtoksjtraot zörgde nog waal es veur euverlast, want in 1406 wert in de gemeinteraod besjlaote dat de vrouwe zich moste beperke tot hunne kant van de sjmaal sjtraot op sjtraffe van 1 gölle.
Vanaaf 1440 duikt in de raodsverdrage 'n derde sjtove op achter de kapel van Maria ter Luttelre in 't noordelik verlengde van de Sjtoksjtraot. Dit bordeel moch sjlechts 3 daag per waek aope zeen. In 1454 is 'r sjpraoke van 'n veerde sjtove achter 't Minderbroederskloeëster wat toen ouch aan de sjtadsmoer loog, och aan de Sjtoksjtraot. 't Is echter neet dudelik of de iesjte twieë sjtove d'r noe nog waore of neet.