Poejerbustel

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


'ne Poejerbustel.

De poejerbustel of pólverbustel (Haemanthus albiflos) is 'n bleujendje plantj oet 't geslech bloodblome (Haemanthus) en behuuertj toete paosbloomfemielje (Amaryllidaceae). De botanische naam verwies nao de witte blome vanne saort. 't Netuurlik verspreijingsgebied vanne saort is Zuud-Afrika op 'n huuegdje van 100 toet 800 m baove zieëspegel. De plantje staon dao in kluten in hieël losse, meh neet gans druuege gróndj inne sjieëm van anger vegetaasje.

De poejerbustel is good te ónthaje, mer 'n zeldjzaam sierplantj, die in Middel-Europa meistes es 'n kamerplantj wuuertj gehaje. De plantje zeen óngeveulig veur gekrenkdjes, meh ze kinne neet taenge vrere, te väöl aanhajendj water of drek zónleech. 'n Gooj plaats veure plantj is 'n werm en sjieëmrieke plaats achter 'ne raam op 't wèsten of 't oeaste. De zomermaondj boeten op 'n sjieëmrieke plaats innen haof of op 'n inne sjieëm gelaenge balkóng wirk ouch veure poejerbustel.

De saort maak mieëjäörige, greunblievendje en 'n bietje vleisjige, kroedechtige plantjen en bereik 'n huuegdje van 20 toet 30 cm. Alle deiler vanne plantj bevatte roead saap. De blajer greuje twieëziejig aan 'nen half-baovegrundjse greune bol mit 8 cm doorsnit. De vleisjige, toet zoeaget 25 bie 10 cm groeate blajer zeen hieël versjillige. De kluuer vanne blajer varieertj van klaor- toet duuster- toet grawgreun, sómwiel mit gaelige vlekken oppe baovekantj van 't blaad. Meistes zeen de blajer kaal en mat, sómwiel ouch glanzendj of lich-behaordj.

De bleujwies versjientj op 'nen toet 25 cm hoeagen, haole stengel drek baoven 'n krants van zoeaget 2 cm lank, mit gruuensig witte sjötblajer. De bleujwies is 'nen toewe bustel van zoeaget 3 toet 5 cm doorsnit, dae väöl klein aafzunjerlike bleujsems bevatj. De toet 5 cm lang, witte maeldräöj mit klaorgael toet oranje helmknuup gaeve de ganse bleujwies de vorm van 'ne bustel. De vleisjige bere kluuere bie rieping klaor oranje toet raod en gaeven 'nen opvallendjen dómpe gäör.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Poejerbustel&oldid=417397"